Սերը նման է ծաղիկի, այն ամենօրյա խնամք է պահանջում. Սոնա Հարությունյան
-Գարնանը՝ բնության զարթոնքի հետ մեկտեղ, առաջնային են նաև կանանց տոները: Ի՞նչ դերակատարություն ունեն տոները կանանց կյանքում:
-Գարուն, բնություն, կին, զարթոնք, սեր, գեղեցկություն. ներքին ներդաշնակություն կա այս բառաշարքում: Տոնը կնոջ կյանքում յուրահատուկ բույր է, դրական լիցքեր տալու և ստանալու առիթ, գնահատված և սիրված լինելու զգացումն ամրապնդելու միջոց, ժամանակը վայելելու արդարացված տարբերակ, նոր գույներ ստեղծելու և շուրջը երջանկության լույս սփռելու ևս մեկ հնարավորություն:
-Ի՞սկ սիրո դերակատարումը կնոջ կյանքում:
-Սերը հիմնաքար է կնոջ կյանքում,
սերն իր լայն իմաստով…
-Նշվում
է, որ սերը կարող է հրաշքներ գործել՝ այստեղ կա՞ հոգեբանական
գործոն:
-Սերն արդեն հրաշք է. ապրելու,
արարելու, գործելու մոտիվ և երաշխիք: Սերն ընդգրկում է մարդուն ամբողջությամբ` հոգեբանական, կենսաբանական
և հոգևոր բաղադրիչներով միաժամանակ: Եվ յուրահատուկ կապ է ստեղծում այլ մարդկանց և
աշխարհի հետ: Ի դեպ, վերջերս հուզիչ հոդված եմ կարդացել, բժշկի պատմություն էր, որտեղ խորագիրը հետևյալն էր` «հիվանդ սիրտը բուժվում է սիրող
սրտով»: Կարծում
եմ այն լիովին պատասխանում է Ձեր հարցին:
-Կանայք ի՞նչն
են ամենից շատ կարևորում, հատկապես տղամարդկանց կողմից:
-Ցանկացած կին կարևորում է սիրված, հարգված և գնահատված
լինելը, հատկապես նրանց կողմից, ում հենց ինքն է արժևորում: Հետևաբար կարող ենք ենթադրել,
որ կանանց համար առաջնային են ուշադրությունը, սերը և հարգանքը տղամարդկանց կողմից:
-Ի՞նչ պետք
է անի տղամարդը կողքին երջանիկ կին ունենալու համար:
-Նախորդ հարցի պատասխանին հետևել, և մշտապես հոգ տանել
հարաբերության մասին: Ասում են` եթե ինչ որ բան չի ստացվում հարաբերությունում, կամ
կինը երջանիկ չէ, ապա սիրո չափաբաժինը ավելացրեք:
-Խանդի մասին
ի՞նչ կասեք, այն կարծես թե վտանգավոր հույզ է համարվում:
-Խանդը տարբեր պատճառներ ունի. կախված պատճառից այն
կարող է լինել նորմալ կամ ախտաբանական: Եթե անհիմն է, բնականաբար վտանգավոր է, նույնիսկ
կործանարար հարաբերության համար:
-Հոգեբանի խորհուրդը
կանանց, և հատկապես տղամարդկանց:
-Ուղերձս մեկն է. «Սիրեք և եղեք սիրված»: Մենք հաճախ
ենք նշում, որ կանանց կյանքում սերը գրեթե ամեն ինչ է, սակայն տղամարդկանց համար ևս
այն ոչ պակաս կարևոր գործոն է, ուստի ուշադիր պետք է լինենք սիրո գործակիցը նախևառաջ
յուրաքանչյուրս մեր ներսում ունենալու, պահպանելու և մեծացնելու հարցում: Չմոռանաք`
սերը նման է ծաղիկի, այն ամենօրյա խնամք է պահանջում: