Տեսանյութ. Տեղին է ասել, որ՝ այո՛, գործը ջուր է.Ճկուն ողնաշարով դատավորները կարողանում են հարմարվել օրվա իշխանություններին
Երբ ՀՀ երկրորդ նախագահ Ռոբերտ Քոչարյանն ազատ արձակվեց, 4 օր հետո Հանրապետության հրապարակում այդ դատավորի նկատմամբ ատելության խոսք ասվեց մի անձի կողմից, ով շատ մեծ վստահություն ուներ ժողովրդի մոտ: Ես համոզված եմ, որ այդ ատելության խոսքը որքան ուղղված էր Ազարյանին, այդքան էլ մեսիջ էր Վճռաբեկի այն դատավորներին, ովքեր պետք է քննեին դատախազի բողոքը: Այդ ամեն ինչը չէր կարող չազդել: Այս մասին լրագրողների հետ զրույցում հայտարարեց երկրորդ նախագահի փաստաբաններից Հայկ Ալումյանը. «Պատկերացնո՞ւմ եք, ժողովրդին ասում են, որ այս մարդը թշնամի է, որովհետև ազատ է արձակել Ռոբերտ Քոչարյանին: Դուք հասկանո՞ւմ եք այդ մարդու վիճակը, եթե նման բան ասողն այդքան մեծ հեղինակություն է վայելում»:«Այն ատելության խոսքը, որը տարածվում էր, դրանից մեծ ճնշում կարելի՞ է պատկերացնել: Ինչպես կարելի է այդ ամենը տեսնել ու որևէ քայլ չանել: ԲԴԽ-ն որևէ բան չձեռնարկեց, իշխանությունները ովքեր պարտավոր էին քրեական գործ հարուցել դատավորի նկատմամբ այդ ամեն ինչի համար, ոչինչ չարեցին: Սա պարզ մեսիջ էր Վճռաբեկի դատավորներին, որ նույնը կլինի նաև նրանց հետ: Դուք մի մտածեք, որ այդ ատելության խոսքը չի ազդում մարդկանց վրա: Դա ուղիղ ուղղորդվել է իշխանությունների կողմից, սակայն եթե նույնիսկ ուղիղ չեն ուղղորդել, առնվազն պարտավոր էին պաշտպանել դատավորին: Պարոն Ազարյանն այս ձևով պատժվեց օրենք կիրառելու համար: Սա հաշվի առնելով՝ մի շարք դատավորներ, ովքեր չէին ուզում իրենց խղճի դեմ գնալ բայց չէին էլ ուզում պարոն Ազարյանի կարգավիճակում հայտնվել, ինքնաբացարկով գործը, այսպես ասած, գցեցին իրենց վրայից»,-ասաց Ալումյանը:
Ռոբերտ Քոչարյանի փաստաբանական խմբի անդամ Հայկ Ալումյանի խոսքով՝ դատարանի որոշումն իրենց համար այդքան էլ անսպասելի չէր՝ հաշվի առնելով այն ճնշումները, որոնք գոյություն ունեն դատարանների նկատմամբ, մասնավորապես՝ Ռ. Քոչարյանի գործի հետ կապված։
«Մենք այդ դեպքում մի քիչ ավելի շատ սպասելիքներ ունեինք՝ հաշվի առնելով այն հանգամանքը, որ բոլոր նյութերը մեր ձեռքի տակ էին։ Այն ամենը, ինչ մինչ այդ կարելի էր ասել ենթադրությունների մակարդակով, հիմա կարելի է հստակ ասել, որ այն, ինչը ներկայացվել է, իրականում ջուր է։ Հիշում ենք, որ վարչապետը սկզբնական փուլում հայտարարեց, որ դատավորներից մեկն ինչ-որ խողովակներով դիմել էր իրեն և ասել, որ գործը ջուր է։ Հիմա ավելի քան տեղին է օգտագործել այս պատկերավոր տերմինը և ասել, որ՝ այո՛, գործը ջուր է»,- լրագրողների հետ հանդիպմանը նշեց Հայկ Ալումյանը։
Փաստաբանի բնորոշմամբ՝ դատարանների նկատմամբ կան ճնշումներ՝ դա կասկածից վեր է, հատկապես՝ Ռ. Քոչարյանի գործով։ Փաստաբանը նման եզրակացության է եկել հայտնի ձայնագրությունների հրապարակումից, ինչպես նաև նախորդ տարվա օգոստոսին վարչապետ Նիկոլ Փաշինյանի հրապարակային ելույթը լսելուց հետո, որտեղ եղել են սպառնալիքներ՝ ուղղված դատավորներին: Բացի այդ, ըստ նրա՝ այդ մասին է վկայում նաև դատարանների այսօրվա վիճակը, քանի որ շատ դատավորներ, չցանկանալով առնչություն ունենալ Քոչարյանի գործի հետ, ինքնաբացարկ են հայտարարել։
«Չեն ցանկանում առնչություն ունենալ այս գործի հետ, քանի որ մի կողմից՝ առկա չեն կալանավորման հիմքերը և պայմանները, մյուս կողմից՝ չեն կարող չկալանավորել, որովհետև պատկերացնում են, որ այն, ինչ արվեց դատավոր Ազարյանի նկատմամբ, երբ պարոն Քոչարյանին Վերաքննիչ դատարանն ազատ արձակեց, նույնը, գուցե ավելի վատ, տեղի կունենա իրենց հետ։ Եվ հայտնվում են երկընտրանքի առջև՝ կա՛մ ապօրինի կալանքի տակ պահել Քոչարյանին, կա՛մ նրան ազատ արձակել և դառնալ թիրախ՝ վարչապետի և գործող իշխանությունների գործողությունների կողմից»,- ասաց փաստաբանը։
Անդրադառնալով Ռոբերտ Քոչարյանի գործին կաշառք ստանալու դրվագի ավելացման հանգամանքին, փաստաբանն ընդգծեց, թե՝ քանի որ 300.1 հոդվածով Ռոբերտ Քոչարյանն անձեռնմխելի է, ուստի որոշել են նրան առաջադրել այնպիսի մեղադրանք, որն առնչություն չի ունենա նրա պաշտոնական գործունեության հետ։
«Նույնիսկ այս պայմաններում Առաջին ատյանի դատարանը գտավ, որ այդ մեղադրանքն անհիմն է»,- հավելեց Հայկ Ալումյանը։
Փաստաբանն անհիմն է որակում դատարանի այն պնդումը, թե Քոչարյանը՝ մնալով ազատության մեջ, կարող է խոչընդոտել գործի ընթացին։
«Պարոն Քոչարյանի ամբողջ տեղաշարժը տեղի է ունենում ԱԱԾ աշխատողների անմիջական մասնակցությամբ։ Քոչարյանի բոլոր հանդիպումները նախապես համաձայնեցվում են նրա անվտանգության աշխատակիցների հետ, որոնք բոլորն ԱԱԾ-ի անվտանգության սպաներ են, և հնարավոր չէ, որ իմ պաշտպանյալն ունենա որևէ հանդիպում, որի մասին մեր իշխանությունները չիմանան»,- ասաց Հ. Ալումյանը։
Նա նաև տեղեկացրեց, որ Եվրոպական դատարան են ներկայացրել հինգերորդ գանգատը՝ կապված Վճռաբեկ դատարանի հետ, որն անհապաղ չի քննում Ռ. Քոչարյանի կալանավորման հարցը։
