Նորածինը փրկեց մոր կյանքը.կաթ է խմել միայն ձախ կրծքից, իսկ աջից հրաժարվել
Փոքրիկ Դուջին ոչ մի կերպ չէր ցանկանում կաթ խմել մոր՝ 37-ամյա Ջոան Կարրի աջ կրծքից: Նրա տարօրինակ պահվածքը օգնել է փրկել կնոջ կյանքը:Բրիտանական Daily Mail պարբերականը հայտնում է, որ երկու երեխաների մայր Ջոանը ուշադրություն է դարձրել, որ նորածին որդին կաթ է խմել միայն ձախ կրծքից, իսկ աջից հրաժարվել է: Սա նրան դրդել է դիմել բժշկի: Պարզվել է, որ նրա կրծքագեղձում 2 սանտիմետրանոց քաղցկեղային ուռուցք կար: Ուռուցքը, հավանաբար, փոքրիկին խանգարել է կաթ խմել, ուստի նա հրաժարվել է այս կրծքից:
«Ես կյանքիս համար պարտական եմ որդուս: Սա իսկական հրաշք էր: Եթե Դուջին չլիներ, ես երբեք չէի իմանա ուռուցքի մասին,- ասել է Ջոանը: - Ոչ մի կասկած չկա, որ նա փրկել է իմ կյանքը»:
Բուժումը սկսել են ախտորոշումը կատարելուց անմիջապես հետո, եւ 2018 թվականի մարտին հեռացրել են քաղցկեղային բջիջների մնացորդները: Նույն տարվա ապրիլին Ջոանին հայտնել են, որ քաղցկեղից ազատվել է:
