Տեսանյութ. Դատարանը չպետք է սպասի սեպտեմբերի 12-ին.պաշտոնաթող նախագահները որեւէ բանի համար չպետք է քրեական հետապնդման ենթարկվեն
Մինչ այսօր նախատեսված էր, որ սեպտեմբերի 12-ին դատավորը քննելու է Ռոբերտ Քոչարյանի խափանման միջոցի հարցը, բայց այն բանից հետո, երբ ՍԴ-ն այս որոշումը կայացրեց, ամեն օրն ու ժամը, որ Քոչարյանը գտնվում է կալանքի տակ, դա արդեն ուղղակիորեն իրավունքի խախտում է: Այս մասին, այսօր՝ սեպտեմբերի 7-ին, լրագրողների հետ հանդիպման ժամանակ նշեց Ռոբերտ Քոչարյանի պաշտպաններից Հայկ Ալումյանը:Հեւտեւաբար, ըստ նրա, դատարանը չպետք է սպասի սեպտեմբերի 12-ին, անհապաղ պետք է դատական նիստ հրավիրի, անդրադառնա խափանման միջոցի հարցին: «Հենց այս պահին պաշտպաններ Օրբելյանն ու Խուդոյանը միջնորդություններ են մուտքագրում Երեւանի ընդհանուր իրավասության դատարան՝ պահանջելով անհապաղ հրավիրել դատական նիստ եւ քննարկել խափանման միջոցի եւ քաղաքական հետապնդումը դադարեցնելու հարցերը»,-ասաց Ալումյանը՝ հավելելով, որ ոչ մի նախադրյալ չի տեսնում, որ ՍԴ որոշումը չի կատարվելու:
Դիտարկմանը, որ քանի որ ըստ ՍԴ որոշման ՀՀ-ում չկա այդպիսի մարմին, որը համապատասխան ընթացակարգով կարող է որոշել, թե որ գործողություններն են բխում պաշտոնաթող նախագահի կարգավիճակից, ստացվում է, որ պաշտոնաթող նախագահները որեւէ գործողության համար չպե՞տք է ենթարկվեն քրեական հետապնդման, Ալումյանը պատասխանեց. «Այո, հենց այդպես է: Օրենքի բացն առաջացրել է այդպիսի հետեւանք: Մենք կարող ենք համաձայն չլինել, այո, պետք է չլիներ այդ բացը, բայց քանի դեռ այդ բացը կա, չկա մարմին, որը կարող է որոշել՝ այս մեղադրանքով որեւէ պաշտոնաթող նախագահ անձեռնմխելի է, թե ոչ: Այստեղ արդեն պետք է նայել, թե Սահմանադրությունից ինչ է հետեւում. Կանխավարկածն անձեռնմխելիությունն է, դրանից կան բացառություննե՞ր, թե՞ հակառակը՝ կանխավարկածը անձեռնմխելիությունից զուրկ լինելն է եւ անձեռնմխելիությունը բացառություն է: Սահմանադրության մեջ առաջին նախադասությունն այսպես է.. Հանրապետության նախագահն անձեռնմխելի »: Այսինքն սահմանում է կանխավարկած, հետո սահմանում է բացառություններ»:
