Ղարաբաղի հայ բնակչությունը մեր քաղաքացիներն են, և նրանց անվտանգությունն ամբողջությամբ կապահովվի, իսկ հայկակա՞ն կողմը...
Լեռնային Ղարաբաղի հակամարտության կարգավորման բանակցություններին այլընտրանք չկա: Այս մասին, ինչպես գրում է interfax-ը, հայտարարել է Ադրբեջանի արտգործնախարար Էլմար Մամեդյարովը:«Բանակցությունների միջոցով խաղաղության հասնելը շատ բարդ գործընթաց է: Ոչ ոք չի կարող լուծել այս հակամարտությունն առանց մեզ: Բոլոր տարբերակները պետք է լինեն սեղանի վրա: Առանցքային հարց է՝ թե ի՞նչ է լինելու հետո: Պետք է ունենալ ռազմավարական համբերություն՝ հակամարտությունը լուծելու համար: Ես չեմ հավատում, որ բանակցային գործընթացը կդադարի: Կարծում եմ, որ խելամտությունը չի լքի հայկական կողմին: Ես չեմ հավատում, որ ինչ-որ մեկը շահագրգռված է բանակցություններից դուրս գալ: Մենք նույնպես միշտ խոսում ենք այդ մասին (խաղաղ բանակցությունների անհրաժեշտության մասին-խմբ․)», - ասել է Մամեդյարովը CBC ադրբեջանական հեռուստաալիքին տված հարցազրույցում:
«Հայկական կողմի գործողությունների և հայտարարությունների 99% -ը հիմնված է հույզերի վրա: Բանակցային գործընթացը պետք է ուշադիր հետևի հասարակության մեջ ներքին տրամադրություններին՝ թե՛Հայաստանում, թե՛ Ադրբեջանում: Սա բնական գործընթաց է և միանշանակ է: Կրքերը, ինչպես Ադրբեջանում, այնպես էլ Հայաստանում, շատ բարձր են: Մենք մեր կողմից չենք հասկանում, թե ինչու հայկական կողմը թույլ չի տալիս Ղարաբաղի հայկական համայնքին շփվել ադրբեջանական համայնքի հետ», - ասում է Մամեդյարովը:
Մամեդյարովն ընդգծում է, որ նույնիսկ ռազմական գործողությունների վերսկսման դեպքում «միևնույն է, բանակցային գործընթացը պետք է տեղի ունենա, քանի որ պատերազմը չի կարող հավերժ լինել»:
Միևնույն ժամանակ, նա ավելացնում է, որ հույզերն ու կարծրատիպերը, որոնք առկա են հայկական կողմում, բացասական հիմք են ստեղծում, և դա կանխում է առաջ շարժվելում:
«Ես միշտ հարցնում եմ հայկական կողմին, այդ թվում լրագրողներին՝ ասեք ինձ առնվազն մեկ փաստարկ, որ դուք շահել եք Ադրբեջանի հետ հակամարտությունից, սկսե՞լ եք ավելի լավ ապրել, միացել եք նախագծերի կամ այլ ինչ-որ այլ բաների»,-ասել է Մամեդյարովն ու հավելել, որ «կարևոր է հասնել սովորական հայ քաղաքացիների սրտերին»։
Մամեդյարովը նշել է, որ հայ գործընկերոջ հետ բանակցություններում քննարկվում են «կոնկրետ և իրական պահեր»:
Ադրբեջանի արտգործնախարարը շեշտել է, որ բանակցությունների ընթացքում հայկական կողմից հայտնվել են տարբեր փաստաթղթեր, որոնցից վերջինը «Լավրովի պլանն է»:
«Լավրովի պլանը մոտ երկու տարի առաջ Մոսկվայում բուռն քննարկումների արդյունք է: Բայց այն, միևնույնն է, հիմնված է մադրիդյան սկզբունքների վրա: ԵԱՀԿ Մինսկի խմբի համանախագահների կողմից կա հայտարարություն 2019-ի մարտի 9-ին, որը պարզապես սահմանում է միջնորդների տեսլականը բանակցություններում առաջ շարժվելու համար: Էությունը շատ պարզ է` փուլային:
Առաջին փուլում զորքերի դուրսբերում, Ադրբեջանի բնակչության վերադարձ, անվտանգության ապահովում, կոմունիկացիաների հաստատում: Հետևաբար, հայկական կողմին ուղղված մեր առաջարկը կարելի է բնութագրել որպես «խաղաղություն՝ բարգավաճման հեռանկարով», - ասել է Մամեդյարովը:
Մամեդյարովը հավելել է, որ Ադրբեջանը համանախագահներին խնդրել է պատրաստել անվտանգության զեկույց՝ անվտանգության հարցի վերաբերյալ:
«Մենք այդ հարցը ըստ էության քննարկել ենք: Հայաստանի համար, ըստ իրենց ԱԳ նախարարի, կարևոր են կարգավիճակն ու անվտանգությունը։ Ի՞նչ է կարգավիճակը, պարզ է, բայց ո՞րն է անվտանգությունը: Համանախագահները նույնպես ցանկանում են հասկանալ այս կետը: Պետք է լինի անվտանգության բանաձև, երբ Ադրբեջանի բնակչությունը վերադառնա ազատագրված տարածքներ։ Ղարաբաղի հայ բնակչությունը մեր քաղաքացիներն են, և նրանց անվտանգությունն ամբողջությամբ կապահովվի: Բայց սա մեր ընկալումն է, իսկ որն է այն հայկակա՞ն կողմի մոտ», - ասել է Ադրբեջանի արտգործնախարարը։
