ԻՊ-ն սպառնացել է իսրայելական բնակավայրերը վերածել հրթիռների եւ քիմիական զենքի փորձարկումների հրաձգարանի
«Իսլամական պետություն» ահաբեկչական կազմակերպությունը հայտարարել է Իսրայելն իր հարձակումների գլխավոր թիրախ դարձնելու ծրագրերի մասին: Այս մասին հայտնում է The Times of Israel պարբերականը՝ վկայակոչելով զինյալների աուդիոհաղորդագրությունը:Նշվում է, որ այսպիսի հայտարարության պատճառը Մերձավոր Արեւելքում Իսրայելի եւ Պաղեստինի միջեւ հակամարտության կարգավորման ԱՄՆ ծրագիրն է, որն անվանում են «դարի գործարք»: Սրա հետ կապված ահաբեկիչները սպառնացել են հարձակումները վերականգնել եւ իսրայելական բնակավայրերը վերածել հրթիռների եւ քիմիական զենքի փորձարկումների հրաձգարանի:
ԱՄՆ նախագահ Դոնալդ Թրամփն ու Իսրայելի վարչապետ Բենիամին Նեթանյահուն ավելի վաղ «դարի գործարքը» քննարկել էին Սպիտակ տանը հանդիպման ժամանակ: Կարգավորման ծրագրի մանրամասները հրապարակվելու են ավելի ուշ:
Այսպես կոչված, «դարի գործարքը»՝ ուղղված պաղեստինա-իսրայելական հակամարտության կարգավորմանը, Սպիտակ տունը ներկայացրել էր 2019 թվականի ապրիլին: ԱՄՆ-ն նախատեսում է բաժանել Երուսաղեմը եւ ստեղծել պաղեստինյան պետություն: Հունիսի 23-ին առաջարկվել էր այս ծրագրի իրականացման համար հատկացնել 50 մլրդ դոլար:
