Եթե մարդիկ հույս ունեն, որ այդ գումարները չեն գանձվելու, ասեմ, որ տուգանքը գանձվելու է
ՀՀ պարետ Տիգրան Ավինյանն այսօր լրագրողների հետ հանդիպմանն անդրադարձավ հարցին՝ հնարավո՞ր է մեկուսացման պահանջը խախտած քաղաքացիներից հետագայում չգանձվեն տուգանքները:«Եթե մարդիկ հույս ունեն, որ այդ գումարները չեն գանձվելու, նման բան չեմ կարող ասել: Իրականացվելու են վարչական վարույթներ, ամեն դեպքով անհատական որոշում է կայացվելու: Սրանք ինքնանպատակ չեն, մենք բոլոր հնարավոր միջոցներով, կոչերով, սահմանափակումներով, օրենսգրքում փոփոխություններով, բոլոր մեխանիզմներով շարունակելու ենք միջոցառումներ իրականացնել, որոնցով կսահմանափակենք մարդկանց տեղաշարժը»,- ասաց նա:
Ավինյանը նշեց, թե այս փուլում շատ կարևոր է, որ ՀՀ բոլոր քաղաքացիներն իրապես գիտակցեն՝ իրենց տեղաշարժը, որ կենսական նշանակություն չունի, որ կապված չէ աշխատանքի հետ, որին պարտադիր պետք է ներկայանան, կապված չէ խնամքի կարիք ունեցող մարդու մոտ գնալու և այլ բացառությունների հետ, պետք է չեղարկեն: Պարետն ասաց, որ այս վարույթները շարունակվելու են, վերահսկողությունը ևս ավելացվելու է, դա նշանակում է, որ այս վարույթների քանակն ավելացվելու է:
Հարցին՝ որտե՞ղ են ծախսվելու այդ գումարները, Ավինյանը պատասխանեց, որ ընդհանուր տրամաբանություն է գործում բոլոր տիպի նմանատիպ հավաքագրումներում. դրանք մուտքագրվում են բյուջե:
Ինչ վերաբերում է առողջապահական համակարգի կարիքները սպասարկելուն, Ավինյանն ասաց, որ առանձնացված գումարները կան, այդ ուղղությամբ բոլոր պաշարները նախատեսել են:
