Մեծ Բրիտանիային սպասում են հիվանդության երկրորդ և երրորդ ալիքները. BBC
Մեծ Բրիտանիան կարող է դառնալ եվրոպական այն երկիրը, որի վրա կորոնավիրուսային պանդեմիայի բացասական ազդեցությունն ամենամեծը կլինի: Այսպես են կարծում աշխարհում ամենամեծ բարեգործական հիմնադրամներից մեկի՝ կենսաբժշկական հետազոտությունները ֆինանսավորող Wellcome Trust-ի փորձագետները: Այս մասին ասել է հիմնադրամի տնօրեն Ջերեմի Ֆարրարը BBC-ին տված հարցազրույցում:Ֆարրարը, որը զբաղվում է բրիտանական կառավարության խորհրդատվությամբ, կոչ է արել դաս քաղել թույլ տված սխալներից և լուծել թեստերի զանգվածային արտադրության և կիրառման հետ կապված հարցերը և ժամանակ գտնել՝ վերազինելու առողջապահական համակարգը:
Նա կարծում է, որ Մեծ Բրիտանիային սպասում են հիվանդության երկրորդ և երրորդ ալիքները, որոնք հնարավոր է մեղմել միայն պատվաստանյութերի ստեղծմամբ և զանգվածային պատվաստումների միջոցով, ինչի համար կպահանջվի առնվազն մեկ տարի:
«Ես շարունակում եմ հուսալ, որ այս ամենը մենք կկատարենք տասներկու ամսվա ընթացքում, բայց սա, իհարկե, աննախադեպ հավակնոտ նպատակ է»,- ասել է հիմնադրամի տնօրենը:
Առողջապահության համաշխարհային կազմակերպության (ԱՀԿ) տվյալներով՝ Մեծ Բրիտանիայում գրեթե 80 հազար մարդ վարակված է կորոնավիրուսով, մահացել է 10 հազար մարդ:
