Ադրբեջանի «մարդու իրավունքների պաշտպանը» վիրավորվել է և չի ցանկանում հանդիպել Հայաստանի ՄԻՊ-ին
Ադրբեջանում մարդու իրավունքների պաշտպանի պաշտոնը զբաղեցնող Սաբինա Ալիևան հայտարարել է, որ չի ցանկանում հանդիպում ունենալ Հայաստանի մարդու իրավունքների պաշտպան Արման Թաթոյանի հետ։ Թաթոյանը օրեր առաջ հայտարարել էր, որ պատրաստ է նման հանդիպում ունենալ՝ մարդու իրավունքների պաշտպանության հարցեր քննարկելու համար։Նրա ադրբեջանուհի գործընկերը հայտարարել է, որ չի պատրաստվում հանդիպում ունենալ Հայաստանի պես պետության ՄԻՊ-ի հետ։ Նա ավանդական խոսքերն է ասել «20 տոկոսի և ՄԱԿ-ի 4 բանաձևերի» մասին։ Սակայն անուշադրության է մատնել այն հանգամանքը, որ Թաթոյանի առաջարկը մարդկանց իրավունքների, ոչ թե քաղաքականությունների քննարկման մասին է։
Էլ ավելի Ալիևային վիրավորել է այն հանգամանքը, որ Թաթոյանը առաջարկում է այդ հիպոթետիկ հանդիպմանը մասնակից դարձնել նաև Արցախի մարդու իրավունքների պաշտպանին։ Մարդու իրավունքների չակերտավոր պաշտպանը չի խորշել քաղաքականությամբ պայմանավորել իրենց հանդիպման հնարավորությունը։
