Տեսանյութ.Ոչ մեկը չի ծախվել, ոչ մեկին չեն առել,այդ բառերն օգտագործողներն են ծախվողները

Նրա խոսքով, այն քաղաքական ուժերն ու գործիչները, որոնք ստացել են հանրության վստահության քվեն, իրենց մասնաբաժնով մասնակցելու են. «Մի մտահոգվեք, ոչ մեկին չեն առել, ոչ մեկը չի ծախվել: Այն մարդիկ, որոնք ապրում են Արցախում, վաղուց ապացուցել են, որ ոչ առնում են, ոչ ծախում են: Քաղաքական գործընթացի արդյունքում ձեւավորվել է քաղաքական նոր դաշտ, որտեղ խաղացողների հիմնական նպատակը մեր ապագան է: Մենք փորձում ենք միասնության, համերաշխության, ընդհանուր օրակարգի շուրջ համագործակցել: Համագործակցելու եմ բոլորի հետ անխտիր: Այդ թվում այդ ոչ վայել հայտարարություններ անողների առումով»,-ընդգծեց Արցախի նախագահը:

«Փոփոխություններ լինելու են կառավարության կառուցվածքում: Կառուցվածքային փոփոխության րդյունքում կարեւորում եմ ռազմահայրենասիրության, երիտասարդության, տրանսպորտի եւ զբոսաշրջության նախարարությունը: Ռազմահայրենասիրություն տերմինն առաջին անգամ ենք օգտագործում կառավարության կառուցվածքում, եւ սա պատահական չէ: Բանակ-հասարակություևն կապը լինելու է մեր նոր կառավարության գլխավոր ուղղություններից մեկը: Ռազմահայրենասիրությունը պետք է դառնա պետական քաղաքականության հիմքը:


Երկրորդ փոփոխությունը լինելու է տարածքային կառավարման եւ զարգացման նախարարությունը: Այստեղ նաեւ բնական ռեսուրսների բլոկն է ներառված լինելու: Քանի որ մենք սահմանադրությամբ պետք է տարածքային բարեփոխումներ իրականացնենք, ինչ-որ տեղ արդեն ուշանում ենք, եւ պարտավոր ենք մեր տարածքային քաղաքականությունը, վարչատարածքային բաժանման օրենքը, եւ ընդհանրապես տեղական ինքնակառավարումը նոր հարթության բերել, որը Սահմանադրության պահանջ է:


Ուզում եմ եւս մի շատ կարեւոր մարմնի մասին ներկայացնել՝  նախագահի վերահսկողության ծառայությունը դառնալու է պետական վերահսկողական ծառայություն: Բոլոր ոլորտների աշխատանքը լինելու է նախագահի վերահսկողության տակ, եւ ստատուսի բարձրացման նպատակը հենց դա է»,-հայտարարեց Արայիկ Հարությունյանը:


Նա տեղեկացրեց, որ այսօր ժամը 12-ին հրավիրել է ընդլայնված խորհրդակցություն. «Պետական պաշտոնյաներից շատերին հրաժեշտ ենք տալու: Այսօր արդեն կլինեն նոր նշանակումներ: Մի քանի օրվա ընթացքում կփորձեմ ավարտել նշանակումների հարցը, որ արդեն հունիսի 1-ից ունենանք ձեւավորված կառավարություն, ձեւավորված իշխանություն: Կլինեն փոփոխություններ նաեւ վարչակազմերի ինստիտուտներում, կլինեն նոր նախարարներ:


Իհարկե, այնպես չէ, որ բոլոր նշանակումներն արդարացված են կամ հասարակությունն է ճիշտ ընդունելու, բայց ուզում եմ վստահեցնել, անկախ նրանից, թե ում ենք նշանակում, սկզբունքը մեկն է՝ պետք է արդարացնի: Չենք կաշկանդվելու օրեր հետո, կամ շաբաթներ հետո ազատվել այն կադրերից, որոնք չեն կատարի իրենց պարտկանությունները:


Ես արդեն հանձնարարել եմ, որ բարձրաստիճան պաշտոնյաների համար աշխատանքային գրաֆիկն սկսվում է ժամը 09.00-ից: Եթե այդ գրաֆիկը ձեռք չի տալիս պաշտոնյաներին, խնդրում եմ հաշվի առնել: Այդ ժամին նրնք պետք է լինեն իրենց աշխատասենյակներում: Կապ չունի, որ ես ավելի շուտ եմ գալիս: Այդպես է սկսվում կարգապահությունը, աշխատանքի հանդեպ վերաբերմունքը: Կատեգորիկ արգելվելու է շռայլություններից օգտվել, ծառայողական մեքենաներ կլինի, թե այլ հնարավորություններ: Դա լինելու է իմ ուշադրության կենտրոնում:


Եթե այս սկզբունքը ձեռք չի տալիս, հրաժարվեք, րպեսզի վաղը ստիպված չլինեմ հեռնալու պահանջ դնել:


Պետք է հարգվեք ժողովրդի ու կոլեկտիվի կողմից եւ աշխատանքի գլխավոր պայմաններից մեկը պետք է լինի հաշվետվողականությունը»,-հայտարարեց Արցախի նախագահը: