Փողոցը մարտահրավեր է նետել Հայաստանի վարչապետին.Փաշինյանի հրաժարականի պահանջով առաջին բողոքի ակցիան. «Կոմերսանտ»
2018 թվականին փողոցային բողոքի ակցիաների արդյունքում իշխանության եկած Հայաստանի Հանրապետության վարչապետ Նիկոլ Փաշինյանն առաջին անգամ բախվեց իր կառավարման դեմ տեղի ունեցող զանգվածային ակցիայի, գրում է ռուսական «Կոմերսանտ» պարբերականը «Փողոցը մարտահրավեր է նետել Հայաստանի վարչապետին» հոդվածում՝ անդրադառնալով հունիսի 14-ին Հայաստանի խոշորագույն ընդդիմադիր կուսակցության` «Բարգավաճ Հայաստան»-ի առաջնորդ Գագիկ Ծառուկյանի հարցաքննությանն ու դրա արդյունքում առաջացած բողոքի ալիքին:Այն բանից հետո, երբ ՀՀ Ազգային անվտանգության ծառայությունը հարցաքննության կանչեց ամենախոշոր ընդդիմադիր կուսակցության առաջնորդին, որը քննադատում է վարչապետին «բոլոր ոլորտներում ձախողման համար», նրա հարյուրավոր աջակիցներ հավաքվեցին ԱԱԾ-ի պատուհանների տակ՝ բղավելով «Նիկո՛լ, հեռացի՛ր» կարգախոսը:
Պարբերականը նշում է, որ ՀՀ իշխանությունների հունիսի 14-ի գործողությունները հանգեցրին նրան, որ Փաշինյանի իշխանության գալու պահից ի վեր առաջին անգամ մարդիկ փողոց դուրս եկան` պահանջելով նրա հրաժարականը:
Բացի այդ, կառավարության հրաժարականի և կորոնավիրուսի դեմ պայքարը տապալելու համար բոլոր պատասխանատու անձանց պատասխանատվության կանչելու կոչ են արել նաև երկրի ազգային անվտանգության ծառայության նախկին ղեկավար Արթուր Վանեցյանն ու «Հայ Յեղափոխական Դաշնակցություն» կուսակցությունը: Վանեցյանը տեղեկացրել է նաև, որ ինքը պարբերաբար հանդիպում է Գագիկ Ծառուկյանի հետ:
Ինքը` վարչապետ Փաշինյանը, վերջին շրջանում կոշտ քննադատության է ենթարկում իր քաղաքական հակառակորդներին` նրանց անվանելով «քաղաքական բացիլներ», հայտարարելով, որ նրանք «իրենց քաղաքական գերեզմանն են փորում», իսկ կորոնավիրուսի համավարակի ավարտից հետո կհայտնվեն «Հայաստանի քաղաքական պատմության աղբանոցում», հիշեցնում է պարբերականը:
Նշենք, որ Գագիկ Ծառուկյանն ԱԱԾ հարցաքննության էր կանչվել 2017 թվականի խորհրդարանական ընտրությունների ժամանակ ընտրողներին կաշառելու և հարկերից խուսափելու գործերով:
«Այս ամենը քաղաքական դրդապատճառներ ունի»,-ավելի քան 8 ժամ տևած հարցաքննությունից հետո հայտարարել է Ծառուկյանը:
