Մարգարիտա Սիմոնյանը հիմա էլ Լուկաշենկոյին է կոչ արել
Russia Today հեռուստաալիքի գլխավոր խմբագիր Մարգարիտա Սիմոնյանը Բելառուսի իշխանություններին և անձամբ նախագահ Ալեքսանդր Լուկաշենկոյին կոչ է արել ազատ արձակել նախագահական ընտրություններից հետո անցկացված բողոքի ակցիաների ժամանակ ձերբակալված լրագրողներին: Այս մասին գրում է «ՌԻԱ Նովոստի» գործակալությունը:Սիմոնյանը նշել է, որ երկրի ղեկավարը «ազատ է երկրում կարգուկանոնի հաստատել իր նախընտրած ձևով», սակայն մամուլի ներկայացուցիչներին իրենց աշխատանքի համար ձերբակալելու իրավունք չունի:
«Եթե դուք չեք ցանկանում թշնամիներ ձեռք բերել այն մարդկանց խմբից, որոնք աջակցել են ձեզ այս ճակատագրական գիշերվա ընթացքում, անհապաղ բաց թողեք Սեմյոն Պեգովին»,-գրել է Սիմոնյանը Տելեգրամում:
Նա հավելել է, որ լրագրողի գործընկերները հենց հիմա պետք է իմանան՝ որտեղ է նա գտնվում, ինչ վիճակում է, և արդյոք նրան բժշկական օգնություն ցուցաբերվում է, թե ոչ:
Սիմոնյանը կոչ է արել նաև ազատ արձակել Ruptly վիդեոգործակալության աշխատակիցներին և բոլոր լրագրողներին, որոնք բարեխղճորեն կատարել են իրենց աշխատանքը:
Բելառուսում օգոստոսի 9-ին՝ ընտրությունների օրը, ձերբակալել են մի շարք լրագրողների: Daily Storm-ի գլխավոր խմբագիր Ալյոնա Սիվկովան տեղեկացրել է «ՌԻԱ Նովոստի»-ին, որ հրատարակության լրագրողներ Անտոն Ստարկովը և Դմիտրի Լասենկոն ձերբակալման պահին նաև ծեծի են ենթարկվել:
