Լեռնային Ղարաբաղի վերաբերյալ Ֆրանսիայի Սենատի որոշումը այդպես էլ որպես առաջարկ կմնա
Ֆրանսիայի Սենատի բանաձեւը Լեռնային Ղարաբաղի վերաբերյալ հիմնականում թելադրված է Փարիզի եւ Անկարայի միջեւ առկա տարաձայնություններով, այն այդպես էլ որպես առաջարկություն կմնա Ֆրանսիայի կառավարության համար, կարծում է Դաշնության խորհրդի միջազգային կոմիտեի ղեկավար Կոնստանտին Կոսաչյովը:«Որքան էլ դա կարող է պարադոքսալ թվալ, բայց ես կասկածներ ունեմ, որ Ֆրանսիայի Սենատի որոշումը ոչ միայն Լեռնային Ղարաբաղի մասին է, լիովին հասկանալով մեր ֆրանսիացի գործընկերների անկեղծ հույզերը, այլ նաեւ` Թուրքիայի»,- ասել է Կոսաչյովը «ՌԻԱ Նովոստի»-ին:
Ըստ նրա` վերջին շաբաթների ընթացքում ֆրանս-թուրքական հարաբերությունները, մի շարք հանգամանքներից ելնելով, այդ թվում` ողբերգական, զրոյական մակարդակում հայտնվեցին, բանը հասավ վիրավորական բնույթի «հաճոյախոսությունների փոխանակմանն» ամենաբարձր մակարդակով:
«Ընդ որում, հայտնի է, որ Թուրքիան, լինելով ԵԱՀԿ Մինսկի խմբի անդամ, այդուհանդերձ բացահայտ ադրբեջանամետ դիրքորոշում ընդունեց Լեռնային Ղարաբաղի հարցում: Եվ այս իրավիճակում ֆրանսիական հասարակության մեջ հայամետ ավանդական համակրանքները գումարվեցին ֆրանսիացի քաղաքական գործիչների կուտակված դժգոհությանը Թուրքիայի պահվածքից միջազգային գործերում»,- կարծում է սենատորը:
Կոսաչյովի կարծիքով` սենատի միաձայն դիրքորոշումը շատ առումներով «վկայությունն է այն բանի, որ Ֆրանսիան ոչ պակաս կտրուկ քայլերի է պատրաստ քաղաքականության մեջ», բայց դեռ ընդամենը վկայությունն է: «Նրանում, որ որպես կառավարությանն առաջարկություն ընդունված այս նախաձեռնությունն այդպիսին էլ կմնա, կասկածներ չկան»,- ասել է խորհրդարանականը: «Միգուցե` ավելի լավ. ի վերջո, Լեռնային Ղարաբաղի շուրջ իրավիճակը պետք է առաջին հերթին հայ-ադրբեջանական երկկողմ քաղաքական երկխոսության թեմա մնա` առանց վերջնագրերի եւ առանց ուժային սցենարների»,- եզրափակել է սենատորը:
