Մակրոնի տեսաուղերձի հաջորդ օրը 1,7 միլիոն ֆրանսիացի է գրանցվել պատվաստման համար
Ֆրանսիայում ռեկորդային թվով մարդիկ գրանցվել են կորոնավիրուսի դեմ պատվաստվելու համար այն բանից հետո, երբ նախագահ Էմանուել Մակրոնը հայտարարել է, որ շուտով իշխանությունները խիստ սահմանափակումներ են մտցնելու չպատվաստված մարդկանց նկատմամբ:Մակրոնը հուլիսի 12-ին հեռուստաուղերձով դիմել է ազգին: Նա նշել է, որ հուլիսի 21-ից կինոթատրոններ և համերգասրահներ, ինչպես նաև փառատոներ հնարավոր կլինի այցելել միայն պատվաստման փաստը հաստատող առողջության թվային անձնագրի կամ վերջերս կատարված ՊՇՌ թեստի առկայության դեպքում:
Օգոստոսի սկզբից, Մակրոնի խոսքերով, առանց թվային անձնագրի անհնար կլինի այցելել սրճարաններ, բարեր և առևտրի կենտրոններ, ինչպես նաև գնել ինքնաթիռի կամ միջքաղաքային գնացքի տոմս: Միևնույն ժամանակ, Մակրոնը նախազգուշացրել է, որ աշնան սկզբից ֆրանսիացիները կկորցնեն պետության հաշվին ՊՇՌ թեստեր անելու հնարավորությունը: Նա ընդգծել է, որ այս կերպ կառավարությունն ակնկալում է «խրախուսել պատվաստումը, այլ ոչ թե թեստերի աճը»:
