Մերկ ֆոտոսեսիա՝ Մեռյալ ծովի ափերի մոտ
Ամերիկացի հայտնի լուսանկարիչ Սպենսեր Թունիկը զանգվածային մերկ ֆոտոշարք է անցկացրել Իսրայելի Արադ շրջանի անապատում: Այդ մասին կիրակի՝ հոկտեմբերի 17 -ին, հայտնել է EFE գործակալությունը:Ֆոտոսեսիային մասնակցել է 19-ից 70 տարեկան 200 մարդ: Նրանց մարմինները սպիտակ են ներկված եղել: Ֆոտոսեսիան տեղի է ունեցել Իսրայելի Արադ քաղաքը շրջապատող անապատային լանդշաֆտի ֆոնին:
Լուսանկարիչը մարդկանց օգնությամբ «կառուցել է» խողովակ, որը «հոսում է» դեպի Մեռյալ ծով:
«Դրանում սպիտակ ներկված մարդիկ խորհրդանշում են աղի հոսքերը», – իր աշխատանքը բացատրել է լուսանկարիչը:
Այսպիսով, նկարիչը հույս ունի համաշխարհային հանրության ուշադրությունը հրավիրել Մեռյալ ծովի անհետացման խնդրի վրա:
Լուսանկարիչը հայտնի է բնության մեջ իր լայնածավալ «մերկ» ստեղծագործություններով: Ամենախոշորը 2007 թվականին կազմակերպվել է Մեխիկոյում՝ 18 հազար կամավորների մասնակցությամբ:
Հայտնի է, որ Մեռյալ ծովը չորանում է: Գիտնականները դրա տարածքի կրճատում են արձանագրում տարեկան մեկ մետրով: Եզակի էկոհամակարգի վերացման պատճառը մարդկային գործոնն է: Այստեղ շարունակաբար արդյունահանվում են օգտակար հանածոներ: Մեռյալ ծովի անհետացման մեկ այլ գործոն է գլոբալ տաքացումը և, որպես հետևանք, տարածքի չափազանց չոր կլիման, ինչը հանգեցնում է ինտենսիվ գոլորշիացման:
