Առաջներում «առարկայական բանակցություններ» մուրում էր Ադրբեջանը, իսկ հիմա մենք
Հուլիսի 11-ին ՀՀ անվտանգության խորհրդի դե-ֆակտո քարտուղար Արմեն Գրիգորյանը, խոսելով հայ-թուրքական «մերձեցման» օրակարգի ու դրան զուգահեռ ընթացող հայ-ադրբեջանական հարաբերությունների կարգավորման մասին, կրկին հնչեցրել է դե-ֆակտո իշխանությունների կողմից ավանդական դարձած «առանց նախապայմանների» հարաբերությունների կարգավորման վերաբերյալ թեզը։Շոշափվել է Ռուբինյան-Քըլըչ հանդիպման արդյունքում ձեռք բերված 3-րդ երկրի քաղաքացիների համար սահմանի բացման վերաբերյալ պայմանավորվածության թեման։ Ընդ որում` ԱԽ դե-ֆակտո քարտուղարը հերքել է, որ «3-րդ երկրի քաղաքացու» թեզի հիմքում ընկած է ադրբեջանցիների համար սահմանների բացումը։ Չնայած թուրք-ադրբեջանական տանդեմի կողմից շարունակ թմբկահարվող թեզին, որ հնարավոր չէ Հայաստան-Թուրքիա հարաբերությունների կարգավորում առանց Հայաստան-Ադրբեջան հարաբերությունների կարգավորման, այն է` Ադրբեջանի պահանջների բավարարման՝ Ա. Գրիգորյանը շարունակում է պնդել, որ դրանք առանձին օրակարգեր են և միմյանց հետ կապ չունեն։ Հիշեցնենք, որ նման հայտարարություններ ՀՀ դե-ֆակտո իշխանություններն անում են միայն ներքին լսարանի առաջ, իսկ Թուրքիայի և Ադրբեջանից հնչող համապատասխան հայտարարություններին երբեք պաշտոնական մակարդակով չեն հակադարձում։
Հայ-ադրբեջանական կարգավորման գործընթացի վերաբերյալ ԱԽ դե-ֆակտո քարտուղարը նշել է, որ պաշտոնական Երևանը հույս է հայտնում, որ մոտակա ժամանակներս կմեկնարկեն առարկայական բանակցություններ Բաքվի հետ` խաղաղության պայմանագրի շուրջ։ Դե-ֆակտո իշխանությունների կարծիքով գործընթացը փակուղում չէ։ ԱԽ դե-ֆակտո քարտուղարը հավելել է, որ Հայատանը միշտ պատրաստ է առարկայական բանակցությունների։ Հիշեցնենք, որ առաջներում «առարկայական բանակցություններ» մուրացողի դերում Ադրբեջանն էր։
hayaliq.com
Ինչպես հասկանալի է դառնում ԱԽ դե-ֆակտո քարտուղարի խոսքերից, դե-ֆակտո իշխանությունները ողջ ուժով լծված են «խաղաղության դարաշրջանի» օրակարգին` հաշվի չառնելով ոչ մի կարմիր գիծ և անվտանգային սպառնալիք, որոնք գալիս են թուրք-ադրբեջանական տանդեմի կողմից։ Եվ այս պայմաններում զավեշտալի է լսել դե-ֆակտո իշխանությունների շուրթերից, թե այդ ընդդիմությունն է, ում համար ՀՀ սուվերենությունը կարմիր գիծ չէ։ Եվ սա այն դեպքում, երբ այս իշխանություններն ի վիճակի չեն եղել նույնիսկ բանավոր հակադարձելու թշնամական պետության ղեկավարի այն հայտարարությանը, թե հակառակ ՀՀ դե-ֆակտո կառավարության ծրագրում ամրագրված դրույթի՝ Հայաստանը չպետք է ունենա 5 միլիոն բնակչություն։
