«Վիճակը խիստ անբավարար է». ԳՇ պետի նախկին տեղակալ Ստեփան Գալստյանին ՔԿՀ-ից տեղափոխել են հիվանդանոց
ՀՀ զինված ուժերի գլխավոր շտաբի պետի նախկին տեղակալ Ստեփան Գալստյանը, որը գտնվում էր «Կենտրոն» քրեակատարողական հիմնարկում, տեղափոխվել է «Էրեբունի» բժշկական կենտրոն։Aysor.am-ի հետ զրույցում Գալստյանի փաստաբան Անդրանիկ Մանուկյանն ասաց, որ Ստեփան Գալստյանը բժիշկների հսկողության տակ է։
«Ստացիոնար բուժում է ստանում։ Վիճակը խիստ անբավարար է», - նշեց նա։
Թե առողջական ինչ խնդիրներ ունի ԳՇ պետի նախկին տեղակալը՝ փաստաբանը հրաժարվեց մանրամասնել՝ նշելով, որ իր պաշտպանյալի համաձայնությունը չունի։
Անդրանիկ Մանուկյանը նշեց, որ Ստեփան Գալստյանի խափանման միջոցի փոփոխման հարցով պատրաստվում է դիմել դատարան։
Հիշեցնենք՝ Երևանի ընդհանուր իրավասության դատարանը՝ նախագահությամբ դատավոր Կարեն Ֆարխոյանի, 2021 թվականի հոկտեմբերի 2-ին Գլխավոր շտաբի պետի տեղակալ Ստեփան Գալստյանին կալանավորելու մասին որոշում էր կայացրել։
Գալստյանը կալանավորվել է ՀՀ ԶՈՒ-երի կարիքների համար ռազմամթերքի մատակարարման գործընթացում չարաշահումներ և առանձնապես խոշոր չափերով հափշտակություններ կատարելու դեպքերի առթիվ քննվող քրեական գործով։
Այս գործով, հիշեցնենք, անցնում են նաև ՀՀ պաշտպանության նախկին նախարար Դավիթ Տոնոյանը, զենքի մատակարարմամբ զբաղվող Դավիթ Գալստյանը՝ «Պատրոն Դավոն», ՀՀ ԶՈՒ ռազմական ավիացիայի նախկին պետ Ավետիք Մուրադյանը։
Իսկ նույն գործով անցնող ավիացիոն տեխնիկական ունեցվածքի ծառայության պետ Արտյոմ Համբարյանը 5 մլն գրավի դիմաց ազատ էր կարձակվել։
