Արցախում ադրբեջանցիների կողմից սպանված ոստիկաններից մեկի վրա 20-ից ավելի հրազենային վնասվածք է եղել
Արցախում մարտի 5-ին ադրբեջանական դիվերսիոն խմբի կողմից սպանված ոստիկաններից մեկի դիակի վրա 20-ից ավելի հրազենային վնասվածք է եղել։Այս մասին «Առաջին ալիք»-ին տված հարցազրույցում ասել է Արցախի պետական նախարար Գուրգեն Ներսիսյանը։
«Այս վայրագության նպատակն այն է, որպեսզի ցույց տան, որ այս ճանապարհով ուզում են վախեցնել» -, ասել է պետնախարարն ու միջադեպը որակել ահաբեկչություն։
Գուրգեն Ներսիսյանը նաև նշել է, որ դեպքը տեղի է ունեցել Ստեփանակերտի մոտակայքում, քաղաքից 6 կմ հեռավորության վրա, որտեղ նաև բնակչություն կա ու քաղաքացիներ կարող են անցնել: Անդրադառնալով միջազգային հանրության պահվածքին՝ պետնախարարն այն անընդունելի է որակել և անվանել արցախցիների դիմադրողականության ստուգում:
«Դիմադրողականություն ստուգելու տեղ այլևս չկա, ոչ զիջելու և ոչ էլ չպայքարելու հնարավորություն կա: Այսուհետ միակ ճանապարհը սեփական ընտանիքում, սեփական հողի վրա պայքարելն է մինչև վերջ: Դա պետք է գիտակցեն թե՛ Ադրբեջանը, և թե՛ արդբեջանա-ղարաբաղյան հակամարտության հանգուցալուծմամբ զբաղվող միջազգային դերակատարները»,- ասել է Գուրգեն Ներսիսյանը:
