Ամեն անգամ, երբ ադրբեջանցիները գրավում են որոշ դիրքեր, նրանք բարելավում են իրենց մարտավարական դիրքերը, նույնիսկ եթե առաջ են գալիս մի քանի մետրով. Stratfor
Քանի որ Հայաստանի և Ադրբեջանի միջև խաղաղ բանակցությունները փակուղի են մտել, էսկալացիայի բռնկումները թե՛ Լեռնային Ղարաբաղում, թե՛ երկու երկրների սահմանին ավելի հավանական են դառնում, թեև Ադրբեջանի լայնածավալ ռազմական գործողությունները կամ հակամարտության մեջ Իրանի անմիջական մասնակցությունը քիչ հավանական են մնում: Նման գնահատականն է տվել ամերիկյան Stratfor վերլուծական հրատարակությունն իր հրապարակումներից մեկում, որտեղ ասվում է, որ Ադրբեջանի գործողությունները և Հայաստանի նախազգուշացումները լարվածության աճի վերջին նախանշաններն են, ինչը ցույց է տալիս, որ բանակցային գործընթացը վտանգի տակ է։ Նշվում է, որ Ադրբեջանը, ամենայն հավանականությամբ, կդիմի հրադադարի փոքրածավալ խախտումների՝ Լեռնային Ղարաբաղի կամ հայ-ադրբեջանական սահմանի երկայնքով տակտիկապես շահավետ տարածքները գրավելու և նմանատիպ այլ գործողությունների։
Չնայած վերջին ագրեսիվ գործողություններին, Ադրբեջանը դժվար թե լայնամասշտաբ ռազմական գործողություն սկսի, քանի որ ավելի քիչ ծախսատար մեթոդները կարող են Բաքվին թույլ տալ հասնել իր նպատակներին, նշել է ամերիկյան պարբերականը
Ամեն անգամ, երբ ադրբեջանական ուժերը գրավում են որոշ դիրքեր, նրանք բարելավում են իրենց մարտավարական դիրքերը, նույնիսկ եթե այդ տարածքային ձեռքբերումները շփման գիծը տեղափոխում են ընդամենը մի քանի մետրով։ Սա մեծացնում է Ադրբեջանի կառավարության բանակցային լծակը: Միաժամանակ, ըստ Stratfor-ի, Բաքուն շահագրգռված չէ անհարկի վտանգել խաղաղության համաձայնագիրը, որը, հավանաբար, մեծ օգուտ կտա իրեն:
Չնայած Ռուսաստանի, ԱՄՆ-ի, ԵՄ-ի և նույնիսկ Թուրքիայի հետ հարաբերություններ հաստատելու՝ Հայաստանի ջանքերին, քիչ հավանական է, որ Երևանը կարողանա ապահովել որևէ արտաքին գործընկերություն, որը կարող է լրջորեն խաթարել Ադրբեջանի ազդեցությունը, ասվում է ամերիկյան պարբերականի վերլուծության մեջ։
Միաժամանակ, Իրանը կշարունակի Ադրբեջանին զսպելուն ուղղված իր գործողությունները՝ պահպանելով առանց այն էլ բարձր լարվածությունը երկու երկրների միջև։
