Ամեն դեպքում պետք է զգուշանալ, որ Պուտինը կարող է մարտավարական միջուկային զենք կիրառել Ուկրաինայում պատերազմի սրման ժամանակ
ԱՄՆ-ն և ՆԱՏՕ-ի նրա դաշնակիցները պետք է զգոն մնան այն նախանշանների հարցում, որ Ռուսաստանի նախագահ Վլադիմիր Պուտինը կարող է մարտավարական միջուկային զենք կիրառել Ուկրաինայում պատերազմի սրման ժամանակ: Այս մասին հայտարարել է պետքարտուղարի տեղակալ Վենդի Շերմանը, գրում է golosameriki.com-ը։Շերմանը նախազգուշացում է արել՝ բացելով ՆԱՏՕ-ի սպառազինությունների վերահսկման ամենամյա համաժողովը, որն այս տարի առաջին անգամ է տեղի ունենում Հյուսիսային Ամերիկայում։
«Մենք բոլորս հետևում էինք և անհանգստանում, որ Վլադիմիր Պուտինը կօգտագործի այն, ինչ նա համարում է ոչ ռազմավարական մարտավարական միջուկային զենք, կամ կօգտագործի ինչ-որ ցուցադրական էֆեկտ՝ սրացման համար, բայց վերահսկվող ռիսկի սրացման շրջանակում: Շատ կարևոր է հետևել դրան», - ասել է Շերմանը:
Պուտինի հայտարարությունն առ այն, Ռուսաստանը պատրաստվում է մարտավարական միջուկային զենք տեղակայել հարևան Բելառուսում, այդ սպառնալիքը կառավարելի կերպով օգտագործելու փորձ է», - հավելել է Շերմանը:
Աղբյուրը գրում է, որ մարտավարական միջուկային զենքերը նախատեսված են մարտի դաշտում հաջողության հասնելու կամ կոնկրետ ռազմական թիրախների դեմ օգտագործելու համար: Պուտինը հերքել է, որ մտադիր է միջուկային զենք կիրառել Ուկրաինայում:
ՆԱՏՕ-ի գլխավոր քարտուղար Ենս Ստոլտենբերգը, որը միացել է Շերմանին համաժողովի բացմանը, Բելառուսում մարտավարական միջուկային զենք տեղակայելու Պուտինի ծրագիրն անվանել է տասնամյակներ շարունակվող «վտանգավոր, անպատասխանատու միջուկային հռետորաբանության» մի մասը, որն ուժեղացել է Ուկրաինայում ռազմական բռնություններին զուգահեռ։
