Էրդողանը շարունակում է մնալ երկրի ամենաճանաչված քաղաքական գործիչը
Թուրքիայի նախագահ Ռեջեփ Թայիփ Էրդողանը շարունակում է մնալ երկրի ամենաճանաչված քաղաքական գործիչը՝ չնայած երկու տասնամյակ իշխանության ղեկին և մայիսին իր կարիերայի ամենադժվար ընտրություններից մեկին դիմակայելուն։ MetroPOLL-ի կողմից օգոստոսին անցկացված «Turkey’s Pulse» հարցումը ցույց է տվել, որ Էրդողանը գլխավորում է Թուրքիայի ամենահայտնի քաղաքական գործիչների ցուցակը՝ հարցվածների 34,6 տոկոսի աջակցությամբ, գրում է Turkish Minute-ը։
Հիշեցնենք, որ Էրդողանը նախագահ է վերընտրվել մայիսին կայացած ընտրությունների երկրորդ փուլով՝ հավաքելով ձայների 52,1 տոկոսը, իսկ նրա հիմնական մրցակից՝ ընդդիմադիր թեկնածու Քեմալ Քըլըչդարօղլուն՝ 47,8 տոկոս։ Էրդողանը հաղթեց իր կարիերայի «ամենադժվար» ընտրություններում՝ երկրում տնտեսական ճգնաժամի և փետրվարին տեղի ունեցած երկու հզոր երկրաշարժերի հետևանքների ֆոնին։ Ըստ հարցման արդյունքների՝ Էրդողանին հաջորդում է Ստամբուլի ընդդիմադիր քաղաքապետ Էքրեմ Իմամօղլուն՝ որպես երկրորդ ամենահայտնի քաղաքական գործիչը, որին «սիրում» է հարցվածների 34,3 տոկոսը։
Թուրքիայի հետախուզության ծառայության նախկին ղեկավար և ներկայիս արտաքին գործերի նախարար Հաքան Ֆիդանը ճանաչված քաղաքական գործիչներից երրորդն է՝ հարցվածների 31,2 տոկոսի աջակցությամբ, որին հաջորդում է ընդդիմադիր Ժողովրդահանրապետական կուսակցության առաջնորդ Քըլըչդարօղլուն։
Պրոֆեսոր Օզեր Սենջարը, որը MetroPOLL-ի սեփականատերն է, X-ում նշել է, որ Իմամօղլուն և Ֆիդանը իրենց ժողովրդականության մակարդակով հետ են թողել բոլոր քաղաքական գործիչներին՝ բացի Էրդողանից։ Նրա կարծիքով՝ Ֆիդանի աճող ժողովրդականությունն օգոստոսյան հետազոտության ամենակարևոր արդյունքն է:
