Մեզ փորձում են օգտագործել ու զոհաբերել, դարձնել Իրանի ու Ռուսաստանի թշնամին, իսկ Թուրքիան ու Ադրբեջանը դա կօգտագործեն մեր դեմ
Թուրքիան, Ռուսաստանը և Իրանն ունեն բազմաթիվ աշխարհաքաղաքական տարաձայնություններ և դարերի ընթքցքում անգամ արյունալի պատերազմներ են միմյանց հետ մղել, սակայն կա մեկ հարց, որում նրանք միշտ միավորվել են: Դա թույլ չտալն է, որպեսզի Արևմուտքը մտնի իրենց ՛՛ներքին բակը՛՛, Հարավային Կովկասը: Այս մասին ֆեյսբուքում գրել է քաղաքագետ Ստեփան Դանիելյանը.«Ռուսաստանի և Թուրքիայի մյուս խնդիրը Սև Ծովը միասնական կերպով վերահսկելն է:
Դա իրենց համար ստրատեգիական, ազգային անվտանգության խնդրներից բխող նպատակ է:
1920-ին մենք տեսանք, թե դա ինչպես է գործել ու այն ժամանակվա Հայաստանի Հանրապետության գլխավոր սխալն, ինչը մեզ վրա շատ թանկ նստեց, այդ պարզ ճշմարտությունը չհասկանալն էր:
Այսօր ևս փորձ է արվում նման մի սխալ կրկնել, ինչը կարող է Հայաստանի Հանրապետության վերջը դառնալ, և շատ մոտ ժամանակներում: Ուկրաինական դասը պետք է լավ հասկանալ, մենք անգամ նրանց ռեսուրսները չունենք, որ գոնե կես Հայաստան մնալու հնարավորություն ունենանք:
Մեզ ցանկանում են դարձնել Իրանի ու Ռուսաստանի թշնամին, որևէ անվտանգության երաշխիք չտալով, իսկ Թուրքիան ու Ադրբեջանը դա կօգտագործեն մեզ դեմ, Իրանին ու Ռուսաստանին ցույց տալով մեր վտանգավոր անադեկվատությունը՝ որպես խորթ մարմին մեր տարածաշրջանում, իրենց գլխավոր նպատակին հասնելու համար:
Մեզ փորձում են օգտագործել ու զոհաբերել, ինչին լծվել են նաև Հայստանում գործող գործակալական ցանցն ու մշտապես գործող Հիմարների Կոնֆեդերացիան»:
