Բաքուն «անհիմն և անհեթեթ» է որակել Հայաստանի՝ ընդդեմ Ադրբեջանի հայցը.Ադրբեջանական կողմը կներկայացնի իր դիրքորոշումը համապատասխան դատարանին
Պաշտոնական Բաքուն արձագանքել է Հայաստանի՝ Արդարադատության միջազգային դատարան ընդդեմ Ադրբեջանի ներկայացված հայցին՝ այն որակելով «անհիմն և անհեթեթ» (չակերտները՝ Tert.am-ի):«Այն փաստը, որ Հայաստանը չի հրաժարվում Ադրբեջանի տարածքային ամբողջականության և ինքնիշխանության նկատմամբ իր նկրտումներից, ադրբեջանցիների նկատմամբ ատելություն սերմանելու նպատակով նոր հայցեր է ներկայացնում՝ անտեսելով նշված գործով Միջազգային քրեական դատարանի նախկին որոշումը, բացարձակապես անընդունելի է», - հայտարարել է Ադրբեջանի արտաքին գործերի նախարարության մամուլի ծառայության ղեկավար Այխան Հաջիզադեն։
Ադրբեջանի ԱԳՆ ներկայացուցչի խոսքով՝ «Հայաստանը չարաշահում է Արդարադատության միջազգային դատարանն իր նենգ քաղաքական օրակարգով, ինչպես արել է ՄԱԿ-ի Անվտանգության խորհրդում»։
«Ադրբեջանական կողմը կներկայացնի իր դիրքորոշումը համապատասխան դատարանին, որը կարտացոլի կոնկրետ արձագանքներ Հայաստանի նոր անհիմն պահանջներին»,- հայտարարել է Հաջիզադեն։
Հիշեցնենք որ սեպտեմբերի 28-ին Հայաստանն ընդդեմ Ադրբեջանի ռասայական խտրականության գործով հայց է ներկայացրել Արդարադատության միջազգային դատարան` Լեռնային Ղարաբաղում ստեղծված իրավիճակի պատճառով՝ պահանջելով միջանկյալ միջոցներ կիրառել։
