Հիմա Բաքվի դեմ պատժամիջոցների ժամանակը չէ, դրանք անարդյունավետ կլինեն և կխոչընդոտեն ՀՀ տարածքն ու նրա բնակչությանը պաշտպանելուն
Ֆրանսիայի նախագահ Էմանուել Մակրոնը կարծում է, որ Լեռնային Ղարաբաղում ստեղծված իրավիճակի պատճառով Ադրբեջանի դեմ պատժամիջոցների կիրառումը անարդյունավետ կլինի։ Այս մասին, ինչպես գրում է ՏԱՍՍ գործակալությունը, նա հայտարարել է Գրանադայում Եվրոպական քաղաքական համայնքի գագաթնաժողովից հետո կայացած մամուլի ասուլիսի ժամանակ։«Հիմա պատժամիջոցների ժամանակը չէ, դրանք անարդյունավետ կլինեն և կխոչընդոտեն Հայաստանի տարածքն ու նրա բնակչությանը լավագույնս պաշտպանելուն: Այժմ պահանջկոտության, հստակության, պարտավորությունների պահպանման և ռազմական աջակցության ժամանակն է. այս տարբերակն է ընտրել Ֆրանսիան: Այս պահին պատժամիջոցների ժամանակը չէ, քանի որ մենք պետք է շարունակենք երկխոսությունն Ադրբեջանի հետ»,-ասել է Ֆրանսիայի առաջնորդը։
Մակրոնի խոսքով՝ Ֆրանսիան անում է հնարավոր ամեն ինչ Հայաստանին, այդ թվում՝ Լեռնային Ղարաբաղի ժողովրդին աջակցելու համար։
«Հիմա գլխավորը (Լեռնային Ղարաբաղից եկած - խմբ․) ընտանիքների հետ կապված իրավիճակն է և սահմանի հարցը»,-ասել է նա՝ հավելելով, որ «անհրաժեշտ է աջակցել Հայաստանի իշխանություններին՝ տարածաշրջանում ցանկացած ապակայունացումից խուսափելու համար»։
