Բայդենը Իրանին զգուշացրել է «զգույշ լինել» շաբաթավերջին Իսրայելի վրա ՀԱՄԱՍ-ի հարձակումներից հետո
Նախագահ Ջո Բայդենը Իրանին զգուշացրել է «զգույշ լինել» շաբաթավերջին Իսրայելի վրա ՀԱՄԱՍ-ի հարձակումներից հետո:Թվարկելով օգնությունը, որն ԱՄՆ-ն ուղարկում է Իսրայելին և նշելով, որ տարածաշրջանում տեղակայվել է ամերիկյան ավիակիր՝ Բայդենն ասել է, որ «իրանցիներին հասկացրել է՝ զգույշ եղեք»:
Բայդենն իր հայտարարությունն արել է Սպիտակ տանը հրեա առաջնորդների կլոր սեղանի ժամանակ։ Միջոցառումը, որը կենտրոնացած էր հակասեմիտիզմի վրա, պլանավորվել էր նախքան հարձակումները, սակայն դրանից հետո այն այլ երանգ ստացավ:
Նա ասել է, որ կրկին խոսել է Իսրայելի վարչապետ Բենիամին Նեթանյահուի հետ։ Զրույցի ընթացքում նա ընդգծել է, որ Իսրայելը պետք է «գործի պատերազմի կանոններով»։
«Բիբինիին ճանաչում եմ ավելի քան 40 տարի։ Մենք շատ բաց հարաբերություններ ունենք։ Ես նրան լավ եմ ճանաչում»,- ասել է Բայդենը։ «Եվ միակ բանը, որ ես ասացի, այն է, որ իսկապես կարևոր է, որ Իսրայելը, չնայած առկա բոլոր զայրույթին և հիասթափությանը, գործի պատերազմի կանոններով: Կան կանոններ»։
Բայդենն ասել է, որ կարծում է, որ Իսրայելի կառավարությունն «ամեն ինչ անում է երկիրը միավորելու համար», և որ ԱՄՆ-ն անում է ամեն ինչ՝ ապահովելու Իսրայելի հաջողությունը։
Նախագահը հարձակումներն անվանել է «մաքուր դաժանության արշավ»։ «Ես կասեի, որ սա հրեաների համար ամենամահաբեր օրն է Հոլոքոստից հետո», - ասել է Բայդենը:
