ԱՄՆ-ում օրենքով գող ճանաչված Ռուբեն Թաթուլյանի նկատմամբ Ռուսաստանը հետախուզում է հայտարարել
ՌԴ ՆԳՆ-ն գործարար Ռուբեն Թաթուլյանի նկատմամբ հետախուզում է հայտարարել։«Ռուբեն Ալբերտովիչ Թաթուլյանը հետախուզվում է Քրեական օրենսգրքի հոդվածով»,- ասվում է գերատեսչության որոնողական տվյալների բազայում, սակայն չի նշվում, թե որ հոդվածով է նա հետախուզվում։
Տվյալների բազայում առկա է նաև, որ հետախուզվողն ունի 2020 թվականին Աբխազիայում տրված դիվանագիտական անձնագիր։
Ըստ «Իզվեստիա»-ի՝ օգոստոսի 31-ին իրավապահները խուզարկել են Սոչիում Թաթուլյանի բիզնես կենտրոններից մեկը։ Գործարարը կասկածվում է բազմամիլիարդանոց գողության մեջ՝ հողօգտագործման և Սոչիում առևտրի կենտրոնների և բնակելի համալիրների կառուցման ժամանակ խարդախության մեջ։
Իրավապահներն այցելել են նաև գործարար Անդրոնիկ Մումջյանի գրասենյակ, որը նույնպես կարող է առնչություն ունենալ անօրինական գործարքների հետ, հաղորդում է «Իզվեստիան»։ Երկու գործարարներն էլ գտնվում են Ռուսաստանի սահմաններից դուրս։
ՏԱՍՍ-ը հայտնում է, որ Թաթուլյանը 2017 թվականին հայտնվել է ԱՄՆ պատժամիջոցների տակ, իսկ սահմանափակող միջոցները տարածվել են նաև Սոչիում գտնվող նրա «Վեսնա» հյուրանոցի և Մոսկվայում գրանցված «Նյու Էյջ Մեդիա» ՍՊԸ-ի վրա։
Հարկ է նշել, որ Ռուբեն Թաթուլյանը (հանցավոր շրջանակներում առավել հայտնի է որպես Ռոբսոն) 2016 թվականի կեսերից մինչև 2017 թվականի վերջը եղել է Հայաստանի արտաքին գործերի նախարարի խորհրդականը և ներգրավված է եղել ՌԴ հարավային մարզերում հայ համայնքին օգնելու հարցերով։
