Ադրբեջանում միջազգային դիտորդների մեծ մասը վճարվել են Ալիևի կողմից․Գերմանացի 2 նախկին պատգամավոր մեղադրվում է Ադրբեջանից կաշառք ստանալու և դրա դիմաց ԵԽԽՎ-ում քվեարկելու համար

[hide][/hide]

Մյունխենի դատախազությունը կոռուպցիայի մեղադրանք է ներկայացրել Քրիստոնեա-դեմոկրատական միության երկու նախկին պատգամավորների՝ Ադրբեջանից ենթադրյալ կաշառք ստանալու համար։

Այս մասին հայտնում է Spiegel-ը։

ՔԴՄ նախկին պատգամավորներ Աքսել Ֆիշերը և Էդուարդ Լինտները Բունդեսթագի անդամներ են եղել համապատասխանաբար 33 և 23 տարի։ Ֆիշերը պատգամավոր չէ 2009 թվականից, Լինտները՝ 2021 թվականից։ Կասկածները վերաբերում էին նաև նախկին քաղաքական գործիչ Կարին Ստրենցին, սակայն նա մահացել է 2021 թվականին։

Հետաքննությունը տևել է ավելի քան չորս տարի և ավարտվել կոռուպցիայի և ընտրված պաշտոնյաների կաշառակերության մեղադրանքներով։

Լինթները մեղադրվում է Ադրբեջանի իշխանություններից միջոցներ ստանալու և այլ պատգամավորներին, այդ թվում՝ Ստրենցին ԵԽԽՎ-ում Ադրբեջանին ձեռնտու որոշումներ կայացնելու դիմաց դրանք փոխանցելու համար:

Դատախազությունը կարծում է, որ Ստրենցը համաձայնել է գործել «Ադրբեջանի ակնկալիքներին համապատասխան»։

Ֆիշերին նույն մեղադրանքներն են առաջադրվել. 2011 թվականին նա, ըստ մեղադրանքի, պայմանավորվել է Ադրբեջանի խորհրդարանի ներկայացուցչի հետ ԵԽԽՎ-ում աջակցել Բաքվին ձեռնտու գծին՝ ապագայում դրամական փոխհատուցման դիմաց։ Խոսքը «դրական» ելույթների, գաղտնի տեղեկատվության փոխանցման և բուն քվեարկության մասին է։

Նախկինում նմանատիպ մեղադրանքներ էին առաջադրվել մեկ այլ պատգամավորի՝ Մարկ Հաուպտմանի նկատմամբ, սակայն Թյուրինգիայում նրա դեմ հետաքննությունը կասեցվել էր։

Լինթները փաստացի չի հերքում, որ զբաղվել է Ադրբեջանի օգտին լոբբինգով և խոստովանել է, որ իր ընկերությունները Ադրբեջանից ավելի քան 3 մլն եվրո են ստացել։ Միաժամանակ նա այժմ հայտարարել է, որ քրեական մեղադրանքն անհիմն է։

***

ԵԽԽՎ անդամ Ֆրանկ Շվաբեն անդրադարձել է Ադրբեջանում կայանալիք նախագահական ընտրություններին և դիտորդների ընտրությանը։

«Ադրբեջանում 512 միջազգային «ընտրությունների դիտորդների» մեծ մասը կեղծ դիտորդներ են: Նրանք պատվիրվել ու վճարվել են Ադրբեջանի նախագահի կողմից։ Մինչդեռ Եվրախորհրդից 30 դիտորդների ներս չեն թողել։ Սա ֆարս է։ ԵԱՀԿ-ն պետք է հրաժարվի դրան մասնակցել»,- նշել է նա։