Եթե հակառակորդը գա, ձեր գրասենյակի մոտ պոստ դնի, ի՞նչ եք ասելու, հետևե՛ք ձեր բառապաշարին». Սիմոնյանը՝ Մինասյանին
ԱԺ-ում «Հայաստան» խմաբկցության քարտուղար Արծվիկ Մինասյանի ելույթից հետո նրան արձագանքեց ԱԺ նախագահ Ալեն Սիմոնյանը, տեղի ունեցավ բանավեճ։Մինասյանը նախ իր ելույթի սկզբում նշեց, որ ԱԺ օրակարգում բացակայում է այս օրերին հանրությանը հուզող և լայն թափ առած «Ազգային շարժմանը» վերաբերող օրակարգային հարցերը։
Նա ընդգծեց, որ ԱԺ ամբիոնից հայտարարություններ են անում, տարբեր լրատվամիջոցներով պիտակավորումներ են կատարում ու ամենաայլանդակ բառապաշարն են օգտագործում տարբեր մարդկանց՝ այդ թվում Բագրատ Սրբազանի հասցեին։
«Փորձում եք վիրավորանքներ հասցնելով իբր թե նսեմացնել շարժումը, բայց դուք դրանով ձեր վախերն եք ընդամենը բացահայտում ու ի ցույց դնում»,- հայտարարեց նա։
Մինասյանը շեշտեց, թե որևէ առնչություն չունի իշխանության բերած փաստարկները մեր պետության անվտանգության հետ։
«Ամենապարզ օրինակը բերեմ, առանց հաշվի առնելու տարրական իրավական գիտելիքը, դուք օգտագործում եք «սահմանի վերարտադրություն» արտահայտությունը։ Բացե՛ք տեսեք, ՀՀ որևէ օրենքով «սահմանի վերարտադրություն» հասկացություն կա՞, դուք այս ի՞նչ եք անում, դուք ոտնահարել, այլանդակել եք Հայաստանի ոչ միայն իրավական, այլ նաև քաղաքական, բարոյական համակարգերը։
Դուք ամեն ինչ տանում եք, հանձնում եք, ինչի՞ համար, մեկ բանի՝ ձեր աթոռների համար, որ մնաք այդ աթոռին կպած։ Կպե՛ք, ինչքան կպնեք այդքան կսոսնձվեք, բայց, որ հեռացվեք աթոռն էլ ձեր հետ կհեռացվի և փոխարինվելու է նորմալ, ազգային աթոռով»,- նշեց Մինասյանը։
ԱԺ նախագահ Ալեն Սիմոնյանն էլ հակադարձեց Մինասյանին․
«Ստացվում է Դուք Ձեր բառապաշարոբվ պնդում եք, որ Հայաստանը որևիցե սահման չունի՞։ Մենք ինչ-որ սահմանով անկախացել ենք, չէ՞։ Դուք երկրորդ խմբակցության քարտուղարն եք, թիվ մեկ ամբիոնից հայտարարում եք, որ Հայաստանը սահման չունի՞։
Հիմա, որ մեր հակառակորդը գա ձեր գրասենյակի մոտ պոստ դնի, ասի՝ Արծվիկ Մինասյանն ասել ա՝ սահման չկա, էդ ժամանակ ի՞նչ եք ասելու։ Հետևե՛ք ձեր բառապաշարին, Հայաստանն ունի կոնկրետ սահման իրավական հիմքերով»։
Արծվիկ Մինասյանը խոսում էր տեղից, բայց Ալեն Սիմոնյանն ասաց՝ պարոն Մինասյան, վերջացավ մեր բանավեճը։
