23 գերիներ ունենք Բաքվում, Ադրբեջանը պատմական շանս ունի դրական դեմքով հանդես գալ աշխարհին
«Խաղաղության պայմանագրի» լիակատար համաձայնեցված 13 կետ կա, ևս երեք կետ՝ կիսով չափ համաձայնեցված։ Այսինքն՝ քննարկումների դեպքում մենք և Ադրբեջանը կարող ենք լուծման գալ։ Այս մասին լրագրողների հետ զրույցում ասաց ԱԺ նախագահ Ալեն Սիմոնյանը։Դիտարկմանը, որ փաստաթուղթ չի ստորագրվում COP29-ի շրջանակներում, արդյո՞ք ՀՀ-ն չի փոշմանում, որ աջակցեց Ադրբեջանին՝ այդ միջազգային միջոցառումն իրենց մոտ անցկացնելու համար․ Ալեն Սիմոնյանն արձագանքեց․ «Մենք ոչ թե աջակցել ենք, այլ՝ շատ վատ իրավիճակում, վատ տրամաբանության մեջ ստիպված ենք եղել դրան համաձայնել, որ 30-ից ավելի գերի վերադառնա ՀՀ»։
Նրա խոսքով՝ որևէ գործողություն, որը միտված է միջոցառումը չեղարկելու, չեն իրականացնում, ինչն ինքը ճիշտ է համարում։
«Ադրբեջանը պատմական շանս ունի դրական մեսիջ ուղղել աշխարհին, դրական դեմքով հանդես գալ աշխարհին. մենք 23 անձ այնտեղ ունենք»,- ասաց նա։
Միջոցառմանը ՀՀ-ի մասնակցության վերաբերյալ որոշում դեռ չկա․ «Եթե պետք է մեր պետությանը՝ կգնանք, եթե ո'չ` չենք գնա»։
