14:15 - Հինգ բան, որ տղամարդիկ ցանկանում են հարաբերություններից         14:00 - Կենդանակերպի նշանների լուսավոր և մութ կողմերը      13:40 - Հայտնի է թե երբ կսկսվի մայիսի կենսաթոշակների վճարման գործընթացը    

14 դեկ 2016 18:10

Ճակատագիր է խեղվում տատիկի անհիմն ցուցմունքով. Տեսանյութեր

Դեկտեմբերի 14-ին Հայացք մամուլի ակումբում լեզվաբան Փառանձեմ Մեյթիխանյանի ամուսնու՝ Եղիշե Խաչատրյանի սպանության գործով մեղադրյալ Յուրի Հակոբյանի մայրը՝ Նարինե Գևորգյանը և պաշտպան Արմեն Նադիրյանը հայտնեցին, որ Յուրի Հակոբյանը անհիմն է գտնվում անազատության մեջ:
«Յուրի Հակոբյանի պլանավորված ամուսնությունը խափանվեց, համալսարանից էլ դուրս է թողնվում՝ ճակատագիր է խեղվում: Նա  վեց ամիս սպասում էր, որ իրականությունը կպարզվի: Մենք ուզում ենք իրականությունը պարզվի: Ինչի՞ համար պետք է նա տևական ժամանակ գտնվի կալանքի տակ, որի հիմքերը չկան»,- ասաց փաստաբան Արմեն Նադիրյանը: 
Հիշեցնենք, որ Հայտնի լեզվաբան Փառանձեմ Մեյթիխանյանի ամուսնու՝ Եղիշե Խաչատրյանի սպանության  մեղադրյալները վեցն են՝ ԴԱՀԿ նախկին աշխատակից Խաչիկ Կոսյանը, Արարատ Նիկողոսյանը, Արտաշես Չիչոյանը, Յուրի Հակոբյանը, Արթուր Զաքարյանը և Հարություն Գրիգորյանը: Վերջինիս մեղադրանքն առաջադրվել է հանցագործության պարտակման համար, նա եղել է Խաչիկ Կոսյանի և Արթուր Զաքարյանի հետ: Նշված անձանցից առաջին 5-ին մեղադրանք է առաջադրվել ՀՀ Քրեական օրենսգրքի 104-րդ հոդվածի 2-րդ մասի 7-րդ կետո (առանձնակի դիտավորությամբ սպանություն՝ մի խումբ անձանց կողմից) և խուլիգանության հատկանիշներով: Կա ևս մեկ անձ, որի ինքնությունը նախաքննական մարմինը դեռևս չի պարզել:
Յուրի Հակոբյանի պաշտպան Արմեն Նադիրյանի խոսքով, ձեռք բերված ապացույցները փաստում են, որ իր պաշտպանյալի մեղադրանքն ապացուցող օրինական հիմքեր չկան: Նա նշեց, որ Յուրի Հակոբյանի նկատմամբ քրեական հետապնդում իրականացնելու հիմք է եղել Եղիշե Խաչատրյանի մոր կողմից Յուրիին ճանաչելը. «Նա նշել է, որ Յուրիին նմանեցնում է  այն երեք երիտասարդներից մեկին, որոնք ծեծի են ենթարկել իր որդուն, սակայն, ասել է, որ վստահ չէ: Այնուհետև հաջորդ ցուցմունքում նշել է, որ վստահ է, որ Յուրին է եղել: Յուրի Հակոբյանը հստակ նշել է իր այլուրեքությունը (ալիբի), ասել է` որտեղ է գտնվել, ում հետ և ինչ է արել: Վարույթն իրականացնող մարմինը մի քանի օրվա ընթացքում պետք է բոլոր մատնանշված մարդկանց հարցաքններ, պարզեր իրականությունը, սակայն, դրա փոխարեն նրա նկատմամբ որպես խափանման միջոց ընտրեց կալանավորումը»,- ասաց պաշտպանը:
Փաստաբանն անդրադարձավ նաև թմրանյութ իրացնելու դեպքով հարուցված քրեական գործին, նշելով, որ իր պաշտպանյալը երբևէ թմրանյութ չի օգտագործել. «Յուրի Հակոբյանի մազի փորձանմուշի հետ կապված փորձագետը նշել է` կա որոշակի չափով թմրանյութի օգտագործման առկայություն, որն ունի մի քանի ամսվա վաղեմություն: Փորձագետը նշում չի արել, թե երբ է հետազոտել փորձաքննության ներկայացված մազի նմուշը, հստակ ժամկետներ չկան: Յուրին ասել է` համամիտ չէ, որովհետև ինքը երբևիցե չի օգտագործել թմրանյութ: Քրեական գործի նյութերով թմրանյութի իրացման փաստով քրեական գործ է հարուցվել  առանձացվել առանձին վարույթով»:
Յուրի Հակոբյանի մայրը` Նարինե Գևորգյանն էլ նշեց, որ իր որդին հայտնվել է անմեղ մեղավորի կարգավիճակում. «Նրա ճակատագիրը խեղեցին տատիկի անհիմն ցուցմունքով: Իմ ընտանիքը ևս տուժող է դարձել: Ես դիմել եմ երկրի նախագահին, որպեսզի քրեական գործի ընթացքը հսկվի, իմ որդին անմեղ է: Ես նիստից առաջ իմ տղային տեսել եմ, 23-ամյա տղաս վեց ամսվա ընթացքում անազատության մեջ հասուն տղամարդ էր դարձել: Խաթարվեց իր կյանքը, չկայացավ իր ամուսնությունը, կորցնում է առողջությունը, ես չեմ կարող որպես մայր ձեռքերս ծալած նստել: Այսքան սպասելուց հետո, նորից նամակ-բողոք եմ ուղարկել Սերժ Սարգսյանին, ՀՔԾ պետին, դատախազին, որ իմ որդին գտնվում է անմեղ մեղավորի կարգավիճակում: Իրականում իմ տղան կատարվածի հետ կապ չունի»:


Մեկնաբանություններ

Անուն:*
Էլ. փոստ:
Գաղտնաբառ: *
Քլիք արեք պատկերի վրա որպեսզի կոդը նորացվի, եթե այն անհասկանալի է

Համընկնող լուրեր