Ովքեր են պատասխանատվություն կրելու` միայն դո՞ւք, թե՞ այն երկու ուժը եւս. Ա. Հովհաննիսյան․ ՏԵՍԱՆՅՈՒԹ
ՀՀԿ խմբակցության հատուկ նիստին այսօր ՀՀԿ խմբակցության քարտուղար Գագիկ Մելիքյանը, հարց ուղղելով Նիկոլ Փաշինյանին, նշեց, որ նրա կողմից բազմիցս են հնչել աշխատատեղերի հարցը, լուրջ արտադրություններ կազմակերպելու հարց. «Դուք ասում էիք, որ մենք սխալ քաղաքականություն ենք վարում Նաիրիտի հետ կապված։ Հենց ժողովրդի անունից ուզում եմ հնչեցնել այդ հարցը` ե՞րբ է աշխատելու Նաիրիտը»:Ի պատասխան Նիկոլ Փաշինյանն ասաց. «Ես չեմ կիսում այն տեսակետը, թե յուրաքանչյուր բողոքի ակցիա երկու ամիս հետ է շպրտում երկրի զարգացումը. ես կարծում եմ` պայքարի ամեն օրը նոր պոտենցիալ է կուտակել զարգացման համար։ Կարծում եմ, որ իշխանափոխությունից հետո լրջագույն ներդրումներ են լինելու հենց մեր հայրենակիցների կողմից»։
«Վագրային թռիչքների մասին առաջ էլ ենք լսել, դա կարծում եմ հեքիաթների ժանրից է»,-հայտարարեց Գագիկ Մելիքյանը։
«Պարոն Մելիքյան, հուսահատություն, կխնդրեի չսերմանել. եթե մինչ օրս չի հաջողվել, դա չի նշանակում, որ դա հետո էլ է այդպես լինելու։ Մեր շարժումը ողջունել են բազմաթիվ տնտեսվարողներ։ Հիմա փոխվել է մարդկանց տրամադրությունը։ Աշխատելու, արարելու տրամադրությունն այն կարեւորն է, որ կանխորոշելու է հետագա զարգացումը»,- նշեց Նիկոլ Փաշինյանը։
ԱԺ փոխնախագահ Արփինե Հովհաննիսյանն իր հերթին հետաքրքրվեց. «Ըստ ձեզ` մեր իշխանության մեջ կան մարդիկ, որոնք քաղաքական, պետական գործչին վայել վարքագիծ են դրսեւորել։ Քաղբանտարկյալների մասին ձեր խոսքում դուք ասել էիք` թե ովքեր են քաղբանտարկյալ, դա կորոշեն մասնագիտացված ՀԿ-երը ու քաղբանտարկյալները ազատ արձակվեն։ Որոնք են այդ կազմակերպությունները, քանի որ հինգ հազար կազմակերպություն կա գրանցված մեր երկրում։ Ի վերջո, Սասնա ծռերը եւս քաղբանտարկյալներ են։ Նաեւ ուզում եմ իմանալ` ձեր կառավարության ձախողման համար ովքեր են պատասխանատվություն կրելու` միայն դո՞ւք, թե՞ այն երկու ուժը եւս, որոնք հայտարարել են շարժմանը միանալու մասին»։
Նիկոլ Փաշինյանը նշեց, որ ոչ թե իր տեսակետն է փոխվել տարբեր խնդիրների մասին, այլ այն գործնական խնդիրը, որը պետական շահերի սպասարկումն է. «”Այո, պետական ապարատում եղել են մարդիկ, որոնք պետական գործչին վայել պահվածք են ունեցել»:
