Տեսանյութ.Փաշինյանի հրաժարականը պահանջող քաղաքացիները կառավարական ամառանոցի մոտ են          Եթե ԱՄՆ-ն ցանկանում է վատթարացնել հարաբերությունները՝ ճանաչելով Հայոց ցեղասպանությունը, ապա որոշումն իրենցն է       Ռուսաստանը խնդիր չունի՝ անհրաժեշտության դեպքում կարող է գնել թուրքական ԱԹՍ-ներ    

06 օգոս 2018 17:24

Ներկայիս իշխանության ընտրած բոլոր տարբերակները շատ ավելի քաղաքակիրթ են, քան անհրաժեշտ է. Տեսանյութ

Հայացք մամուլի ակումբում քաղաքագետ Հայկ Մարտիրոսյանը խոսեց ներքին և արտաքին նոր մարտահրավերների, ինչպես նաև արցախյան հիմնահարցի շուրջ:
 
Խոսելով արցախյան հիմնահարցի մասին  Հայկ Մարտիրոսյանը նշեց, որ հարցի շուրջ ակտիվացած խոսակցությունները կապված են հակահեղափոխական գործողությունների հետ.«Ես ընդհանրապես դեմ եմ «տարածքների վերադարձ» արտահայտությանը. չկա վերադարձ, կա հանձնում: Դրանք հայկական տարածքներ են: Պետք է աստիճանաբար հրաժարվել ամբողջ բանակցային փաթեթից և Արցախի անկախության և ազատության մոտեցումից քանի որ այն շատ վտանգավոր է հայկական հարցի, Հայաստանի և նույն Արցախի անվտանգության համար: Մենք այդ 7 շրջանները որևէ իրավական նորմով չենք կարող պահպանել, եթե Արցախը չենք ճանաչում Հայաստանի Հանրապետության տարածք: Տարածվող այն խոսակցությունները թե հնարավոր է ներկայիս իշխանությունները տարածքներ զիջեն, ապա ասեմ, որ այս իշխանությունը չունի որևէ տարածք հանձնելու մտադրություն: Իսկ հեղափոխությունը դեռ կիսատ է, այն պետք է տեղի ունենա նաև Արցախում: Բակո Սահակյանը համակարգի մաս է և պետք է նույնպես հեռացվի»,-նշեց Հայկ Մարտիրոսյանը:
 
Անդրադառնալով իր դեմ սկսված արշավին՝ նա հիշեցրեց իր խոսքը, որը կոնտեքստից կտրված էր ներկայացվել. «Եթե Արցախը իրապես ուզում է անկախ լինել Հայաստանից, եթե Արցախում իրապես գտնում են, որ իրենք պետք է անկախ լինեն և սրտանց  հավատում են այդ անկախությանը, ապա միայն այդ պարագայում արցախցիները թող իրենք պաշտպանեն Արցախը: Եթե անկախ պետություն է, ինչո՞ւ պետք է ՀՀ զինվորները գնան և զոհվեն ուրիշ ժողովրդի (անգամ մարդու բերանի չի պտտվում ասել, որովհետև մենք նույն ժողովուրդն ենք) անկախության կամ ազատության համար»:
 
Ինչ վերաբերվում է արտահերթ խորհրդարանական ընտրություններին  Հայկ Մարտիրոսյանի կարծիքով՝ տեղի կունենան կա՛մ ձմռանը, կա՛մ գարնանը, ինչը նա լավ տարբերակ չի համարում: «Ես կարծում եմ, որ հեղափոխական տրամադրությամբ պետք է ընդհանրապես Ազգային ժողովը ցրվեր Հանրապետության հրապարակում, պետք է Սահմանադրությունը կասեցվեր Հանրապետության հրապարակում: Ցավոք սրտի, այժմ խոսք չի գնում սահմանադրական փոփոխությունների մասին, իսկ Սահմանադրությունը ոչ լեգիտիմ է, բոլոր օրենսգրքերը ոչ լեգիտիմ են: Կարելի էր դրանք դադարեցնել, արտակարգ դրություն հայտնել, և հավաքված անսահմանափակ ուժով կարելի էր անել ամեն ինչ: Դա է դասական հեղափոխության օրինակը: Ներկայիս իշխանության կողմից ընտրված մնացած բոլոր տարբերակները շատ ավելի քաղաքակիրթ են, քան անհրաժեշտ է, և դրանք մեծ խնդիրներ հարուցեցին և հարուցելու են իշխանությունների համար: Իմ խորին համոզմամբ՝ հայտնվել ենք շատ բարդ իրավիճակում: Ըստ էության լրջագույն քաղաքական ճգնաժամ է ստեղծվել, որովհետև հակապետական գործողություն ծավալած պարտված մարդիկ հիմա ունեն ազատություն և մեծ թափով են ծավալում. ստեղծվել է ժողովրդավարության վակխանալիա»,- նկատեց Հայկ Մարտիրոսյանը:
Ամբողջական ասուլիսը՝ Hayacq.com-ի տեսանյութում


Մեկնաբանություններ

Համընկնող լուրեր