Տեսանյութ.Ուկրաինայի առողջապահության նախարարը 65 տարեկանից բարձր անձանց համեմատել է «դիակների» հետ
Ուկրաինայի առողջապահության նախարար Իլյա Եմեցը 112.ua-ին տված հարցազրույցում 65 տարեկանից բարձր անձանց համեմատել է դիակների հետ։Խոսելով երկրում կորոնավիրուսի տարածման մասին՝ նախարարը կոչ է արել բիզնես հատվածին մասնակցել բժշկական սարքավորումների և պարագաների գնմանը։
Եմեցն ընդգծել է, որ ֆինանսիստները միջոցները հաշվարկելու ժամանակ չպետք է հույսները դնեն 65-ն անց մարդկանց վրա:
«Ես միշտ ասում եմ` հաշվե՛ք, թե որքան ֆինանս պետք է հատկացվի ողջ մարդկանց և ոչ թե դիակների համար»,- նշել է Եմեցը։
Վերջին տվյալների համաձայն՝ Ուկրաինայում հաստատվել է կորոնավիրուսով վարակման 73 դեպք, որից 3-ը՝ մահվան ելքով։ Նշվում է, որ երկրում հիվանդությունից ապաքինվել է մեկ մարդ։
Հայտնի է, որ ամբողջ աշխարհում կորոնավիրուսով վարակվածների թիվը գերազանցել է 338 000-ը, ավելի քան 14 000 մարդ մահացել է, ապաքինվել՝ ավելի քան 99 000-ը: Չինաստանի իշխանություններն անհայտ տեսակի վարակի համաճարակի մասին Առողջապահության համաշխարհային կազմակերպությանը տեղյակ էին պահել դեկտեմբերի 31-ին:
