Ադրբեջանը հող է նախապատրաստում Հայաստանի դեմ ռազմական գործողություններ սկսելու.2 հայ սպաների նկատմամբ հետախուզում հայտարարելու մասին
Երեկ համացանցում տեղեկություններ տարածվեցին, որ Ադրբեջանի իրավասու մարմինները քրեական օրենսգրքի մի շարք հոդվածներով քրեական հետապնդում են նախաձեռնել երկու հայ սպայի նկատմամբ՝ Վազգեն Վարդանյանի և Արմեն Ջամալյանի:ՀՀ ոստիկանությունից հայտնել են, որ Ինտերպոլի ուղիներով այս պահին որևէ հետախուզում չի իրականացվում:
Թուրքագետ, քրդագետ Կարեն Հովհաննիսյանը կարծում է, որ Ադրբեջանի գլխավոր դատախազության կողմից հայ սպաների նկատմամբ հետախուզում հայտարարելու նպատակները հեռահար են:
Ըստ նրա, Ադրբեջանը հող է նախապատրաստում Հայաստանի դեմ ռազմական գործողություններ սկսելու՝ կիրառելով թուրքական փորձը:
«Սկզբում հայտարարում է ահաբեկչության մասին, մեղադրանքներ է առաջադրում, հետախուզում է հայտարարում, այնուհետև սկսում է ռազմական գործողություններ: Ռազմական գործողությունները սկսում է արդարացնել հետևյալ տրամաբանությամբ, որ տվյալ երկիրը կամ տվյալ երկրի քաղաքացին ահաբեկչական գործողություն է նպատակադրել, և իրենք հենց դրա համար են սկսում իրականացնել ռազմական գործողություններ, որի անունը դնում են հակաահաբեկչական գործողություններ:
Պատմությունը ցույց է տալիս, որ Ադրբեջանը կրկնում է այն սցենարները, որոնք Թուրքիան է օգտագործում հարևան պետությունների դեպքում: Թուրքիան իրաքյան Քրդստանում և Թուրքիայի քրդաբնակ շրջաններում օգտագործեց հարվածային ԱԹՍ-ներ, և հենց 2016թ. ապրիլյան պատերազմում Ադրբեջանը կրկնեց Թուրքիայի փորձը՝ օգտագործելով հարվածային ԱԹՍ-ներ»,- ասում է Կ. Հովհաննիսյանը:
Թուրքագետի համոզմամբ, Ադրբեջանը մի կարևոր բան հաշվի չի առել և հաշվի չի նստում դրա հետ.
«Եթե Թուրքիան այդ փորձը օգտագործում է քրդական գործոնի դեպքում (քրդերը չունեն ռազմական միավոր և պետականություն), ապա Հայաստանի դեպքում լրիվ այլ հարց է:
Հայաստանի ռազմական միավորը՝ կանոնավոր բանակը, և Հայաստանը բազմիցս հայտարարել են, որ Հայաստանը հանդիսանում է Արցախի անվտանգության երաշխավորը, և Ադրբեջանը այս հանգամանքը հաշվի չի առել:
Եթե Ադրբեջանը փորձի գնալ արկածախնդրության, ստանալու է այն հարվածը, որը ստացավ հուլիսին՝ տավուշյան հատվածում»:
Հովհաննիսյանի խոսքերով՝ Ադրբեջանի ոտնձգությունների, սադրանքների նկատմամբ միջազգային կազմակերպությունների լռությունը կանաչ լույս է այդ երկրի համար: Ադրբեջանը սա ընդունում է ի գիտություն և որպես համաձայնության նշան:
«Միջազգային կազմակերպությունների ոչ միայն լռությունը, այլ նաև որոշ դեպքերում անհասցե հայտարարությունները, որով հակամարտող կողմերին կոչ են անում զսպվածություն դրսևորել, ևս նպաստում են, որպեսզի Ադրբեջանը իրականացնի սադրիչ գործողություններ:
Եթե այդ հայտարարությունները լինեն հասցեական, ապա դա կլինի զսպող գործիք և գործոն Ադրբեջանի համար, և չի սանձազերծի այնպիսի գործողություններ, որոնք իրենց մեջ պարունակում են սադրանք»,- շարունակեց քրդագետը:
Հովհաննիսյանը շեշտում է, որ պետք է անընդհատ միջազգային կառույցներին հորդորել, հայտարարություններով ստիպել, որպեսզի հանդես գան հասցեական հայտարարություններով:
«Եթե հայկական կողմն է խախտում որևէ բան, թող հայկական կողմի հասցեին հնչեցվի հայտարարությունը, Ադրբեջանը կխախտի, թող Ադրբեջանի հասցեին հնչեցվի, որովհետև անհասցե հայտարարությունները տանում են ռազմական բախման:
Հենց այստեղ է, որ ԱԳՆ-ն իր հայտարարություններով պետք է անընդհատ ամենշաբաթյա ռեժիմով միջազգային կառույցներին հորդորի, որպեսզի հանդես գան հայտարարություններով:
Պաշտպանության նախարարությունն իր գործառույթը իրականացնում է բավականին լավ, կարող եմ ասել գերազանց. ամբողջ սահմանագծում իրականացնում է լիակատար վերահսկողություն և ցանկացած սադրանքին կարող է արձագանքել»,- եզրափակեց Կարեն Հովհաննիսյանը:
