Վիրաբույժները տղամարդու օրգանիզմից հաջողությամբ դուրս են բերել վեց ամիս առաջ կուլ տված բջջային հեռախոսը
Եգիպտոսի բնակիչն անհապաղ վիրահատության է ենթարկվել. բժիշկները նրա ստամոքսից հեռացրել են բջջային հեռախոսը, որը նա կուլ էր տվել վեց ամիս առաջ:Ինչպես հաղորդում է Oddity Central-ը, Եգիպտոսում առաջին անգամ է նման վիրահական միջամտություն տեղի ունեցել: Ասվան քաղաքի համալսարանական հիվանդանոցի բժիշկները տղամարդու օրգանիզմից դուրս են բերել փոքր չափսի բջջայինը, որը կես տարի մնացել էր նրա աղիներում:
Նշվում է, որ Մոհամեդ անունով տղամարդուն հիվանդանոց են տեղափոխել որովայնի խիստ ցավերով: Համակարգչային շերտագրությունը ցույց է տվել, որ նրա աղիներում օտար մարմին կա: Նրան անհապաղ պատրաստել են վիրահատության, որի ընթացքում էլ պարզվել է, որ օտար մարմինը սննդային թաղանթով փաթաթված հեռախոս է եղել:
Հիվանդը, որն այժմ իրեն լավ է զգում և կարողանում է նորմալ սնվել, հաստատել է, որ վեց ամիս առաջ հեռախոսը կուլ է տվել: Վերջինս նշել է, որ նախկինում ևս նման փորձ ունեցել է, սակայն այս անգամ հեռախոսը բնականոն ճանապարհով դուրս չի եկել օրգանիզմից:
Մոհամեդը խոստովանել է, որ բջջայինը կուլ է տվել, որպեսզի խուսափի այն անվտանգության աշխատակիցներին հանձնելուց խուզարկության դեպքում: Հետաքրքիր է, որ այն ամիսներ շարունակ մեծ նեղություն չի տվել տղամարդուն, որը շարունակել է նորմալ սնվել: Սակայն մի օր ուժեղ ցավեր են սկսվել, և իրեն հոսպիտալացրել են:
