Չինաստանը մինչեւ 2049 թ. կդառնա «համաշխարհային կարգի» ռազմական տերություն, կարող է հաղթել սպառազինությունների նոր համաշխարհային մրցավազքում
Չինաստանը արագ տեմպերով համալրում է իր զինված ուժերը։ Շատ արեւմտյան դիտորդներ այժմ կարծում են, որ ռազմական ուժերի գլոբալ հավասարակշռության մեջ խորը տեղաշարժ է տեղի ունենում, գրում է BBC-ն:Նախագահ Սի Ծինփինը կարգադրել է արդիականացնել Չինաստանի բանակը մինչեւ 2035 թվականը: Նրա խոսքով, մինչեւ 2049 թվականը երկիրը պետք է դառնա «համաշխարհային կարգի» ռազմական տերություն, որն ընդունակ է «առաջնորդել եւ հաղթել պատերազմներում»։
Type 003 Fujian ավիակիրը գործարկվել է Շանհայում հունիսին եւ հանդիսանում է Չինաստանում երբեւէ կառուցված ամենաառաջադեմ ռազմանավը:
Նավը չինական երրորդ ավիակիրն է եւ, ի տարբերություն մյուս երկուսի, նախագծվել է չինացի ինժեներների կողմից։
Ռազմական փորձագետները ասում են, որ Fujian-ի էլեկտրամագնիսական օդանավերի արձակման համակարգը զգալի առաջընթաց է Չինաստանի ռազմածովային նավատորմի համար, որը հնարավորություն է տալիս ավելի արագ տեղակայել ինքնաթիռներ եւ տեղափոխել ավելի ծանր ինքնաթիռներ:
Դեռեւս պարզ չէ, թե որքան ժամանակ կպահանջվի Fujian-ի փորձարկման ու ամբողջական հագեցման համար, եւ երբ այն կսկսի ծառայությունը, բայց այն կմիանա նավատորմին, որը 2014 թվականին առաջ է անցել ԱՄՆ նավատորմից՝ դառնալով աշխարհի ամենամեծ նավատորմը:
Թեեւ նավերի քանակի պարզ համեմատությունը հաշվի չի առնում նավատորմի հնարավորությունները որոշող շատ գործոններ, վերլուծաբանները կարծում են, որ միտումների ուսումնասիրությունն օգտակար է։
Առայժմ ԱՄՆ-ը պահպանում է ռազմածովային հզոր առաջատարությունը՝ 11 ավիակիրներով դեպի Չինաստանի երեք եւ ավելի շատ միջուկային սուզանավեր, հածանավեր եւ կործանիչներ կամ ավելի մեծ ռազմանավեր:
Սակայն ակնկալվում է, որ Չինաստանը զգալիորեն կընդլայնի իր նավատորմը: ԱՄՆ ռազմածովային նավատորմը կանխատեսում է, որ 2020-2040 թվականներին չինական ռազմածովային ուժերի նավերի ընդհանուր թիվը կավելանա գրեթե 40 տոկոսով։
Նոյեմբերին ԱՄՆ պաշտպանության նախարարությունը կանխատեսել էր, որ Չինաստանը մինչեւ այս տասնամյակի վերջը կքառապատկի իր միջուկային զինանոցը։ Չինաստանը «հավանաբար մտադիր է մինչեւ 2030 թվականը ունենալ առնվազն 1000 մարտագլխիկ», ըստ Պենտագոնի:
Չինաստանի պետական լրատվամիջոցները պնդումն անվանել են «վայրի եւ կանխակալ շահարկումներ»՝ հավելելով, որ միջուկային ուժերը պահվում են «նվազագույն մակարդակի վրա»:
Այնուամենայնիվ, Ստոկհոլմի Խաղաղության միջազգային հետազոտությունների ինստիտուտի փորձագետները, որոնք հրապարակում են աշխարհի պաշարների տարեկան գնահատականները, ասում են, որ Չինաստանը վերջին տարիներին ավելացնում է իր մարտագլխիկների թիվը:
Չինաստանը դեռ շատ հեռու է ԱՄՆ-ի 5550 միջուկային մարտագլխիկներից, սակայն նրա միջուկային զենքի կուտակումը համարվում է Արեւմուտքի ռազմական գերազանցության ամենամեծ սպառնալիքներից մեկը:
Ենթադրվում է, որ Չինաստանն արդեն կարող է արհեստական բանականություն օգտագործել ռազմական ռոբոտաշինության եւ հրթիռների ուղղորդման համակարգերում, ինչպես նաեւ անօդաչու սարքերում եւ անօդաչու ռազմածովային նավերում։
Հուլիսին Մեծ Բրիտանիան, ԱՄՆ-ը եւ ԵՄ-ն մեղադրեցին Չինաստանին Microsoft Exchange սերվերների վրա խոշոր կիբեռհարձակում իրականացնելու մեջ։ Ենթադրվում է, որ հարձակումն առնչվել է առնվազն 30 000 կազմակերպությունների ամբողջ աշխարհում եւ ուղղված է եղել լայնածավալ լրտեսությանը, ներառյալ անձնական տեղեկատվության եւ մտավոր սեփականության ձեռքբերումը:
