Արցախն իսկապես բարդ վիճակում է, բայց հերիք է ամեն մեկն իրեն հայրենասերի տեղ դնի ու խաղեր խաղա , զզվել ենք այդ ամենից
Այս պահի դրությամբ իրավիճակը համեմատաբար կայուն է, ընդհանուր առմամբ հանգիստ է: Այս մասին NEWS.am-ի հետ զրույցում նշեց Արցախի ԱԳ նախարար Դավիթ Բաբայանը:Անդրադառնալով նախօրեին Ադրբեջանի զինուժի կողմից առաջխաղացման փորձերին, նա ասաց. «Ընդհանուր առմամբ, որպեսզի ամեն ինչ լինի մաքսիմալ ճշգրիտ եւ իրականությանը համապատասխան, պետք է բացառապես հետեւել պաշտոնական լրահոսին: Հիմա դժբախտաբար, նորից ականատես ենք լինում տարբեր մարդկանց կարծիքներին, շահարկումներին, նորից բուսնում են ինչ-որ դեմագոգներ, փորձում են հիշել սա կամ նա: Կարծես իրենց պատրվակ է պետք իրենց ոչ նորմալ, երբեմն էմոցիոնալ, երբեմն մի քիչ իրականությանը համապատասխանող կամ չհամապատասխանող կարծիքները ներկայացնելու համար: Դա ճիշտ չէ, Արցախն իսկապես բարդ վիճակում է: Դա չի նշանակում, որ ամեն անգամ մի աննորմալ քոմենթ պետք է գրեն, հերիք է, զզվել ենք այդ ամենից: Հերիք է ամեն մեկն իրեն հայրենասերի տեղ դնի ու խաղաղ այդ խաղը:
Բնական է, որ սա ոչ մի բանով պայմանավորված չէ, դա Ադրբեջանի պետության էությունն է: Երբեմն տարակուսանք են առաջացնում նման հարցադրումները, թե ինչու են այսպես արել: Իսկ ինչո՞ւ չպետք է անեն, եթե նույն նպատակն է, նույն հակառակորդն ու թշնամին է, ունի նույն նպատակները, ինչու չպետք է դիմի տարբեր սադրանքների: Իհարկե, դիմելու է, հետեւաբար, պետք է պինդ լինենք հասկանանք, որ կան բոլոր հնարավորությունները պահպանելու Արցախը, թույլ չտալ, որ նրանց ծրագրերն իրականություն դառնան: բայց որպեսզի դա տեղի ունենա, մեզ պետք է ճիշտ ձեւով պահենք: Պետք է լինենք սթափ, չենթարկվենք տարբեր սադրանքների, առավել եւս խուճապի, հասկանանք, որ մեն-մենակ չենք եւ ըստ այդմ, մեր կյանքն ու քայլերը ձեռնարկենք: Եվ ամենակարեւորը, հնարավորինս հեռու լինենք դեմագոգներից եւ տարբեր տիպի ֆեյսբուքյան ստրատեգներից»:
Արցախի ԱԳ նախարարը հստակեցրեց,ո ր Ադրբեջանի գերնպատակը Արցախը հայաթափելն է. «Իրենք ընդհանրապես ուզում են, որ Արցախում հայ չմնա: Սա նաեւ ակնհայտորեն հարված է ռուս խաղաղապահությանը, որովհետեւ որեւէ հիմք չկա նման սադրանքների դիմելու: Այդ հիմքը միայն իրենց ծրագրերն ու ատելությունն են: Արցախը զբաղվում է իր առօրյայով, մարդիկ սադրանքների չեն դիմում, խաղաղապահներն իրականացնում են իրենց ծառայությունը, հետեւաբար, այն, ինչ տեղի է ունենում, դա նրանց հայատյած ծրագրերի ու ատելության արդյունք է: Այնուամենայնիվ, մենք պետք է զուսպ լինենք, հասկանանք, որ իրավիճակը բարդ է, բայց կրիտիկական չէ: Երբեւիցե չընկնենք խուճապի մեջ, որովհետեւ խուճապն արդեն պարտություն է: Ամենակարեւորը, որ մեր ՊԲ-ի տղաները կանգնած են իրենց տեղում, խաղաղապահները իրենց տեղում»:
Հիշեցնենք, որ այսօր՝ ժամը 09:00-ից սկսած, Արցախի Հանրապետության հյուսիսային եւ հյուսիս-արեւմտյան սահմանագոտու մի շարք հատվածներում ադրբեջանական ստորաբաժանումները դիմել են սադրանքի՝ կատարելով շփման գիծը հատելու փորձեր, որոնք կասեցվել են ՊԲ ստորաբաժանումների ուժերով: Հայկական կողմից դիրքային եւ մարդկային կորուստներ չկան: Կատարվածի մասին հանգամանալից տեղեկատվություն է տրամադրվել ռուսական խաղաղապահ զորակազմի հրամանատարությանը։
Ավելի ուշ հայտնի դարձավ, որ հայկական կողմն ունի մեկ վիրավոր:
