Միգուցե Պեմզաշենի ողբերգության հետևում կանգնած են եղել այլ պատվիրատունե՞ր, գուցե կրոնական ծիսակատարությո՞ւն էր, գուցե վրեժի՞ արդյունք
«Իրավունք» օրաթերթը գրում է․ «Պեմզաշենում մոր եւ երկու երեխաների առանձնակի դաժանությամբ սպանության գործով կալանավորված 32-ամյա Վրույր Բարսեղյանը կարող է անմեղսունակ ճանաչվել ու խուսափել պատժի կրումից: «Եթե անգամ հանցագործն անմեղսունակ ճանաչվի, չի ազատվի պատժից», -այս մասին Հանրայինի եթերով հայտարարել է վերը նշված գործով քննչական խմբի ղեկավար Նարեկ Գարեգինյանը: Այս հարցի եւ սպանության հնարավոր շարժառիթների մասին զրուցել ենք աղմկոտ գործերով հայտնի փաստաբան Լևոն Բաղդասարյանի հետ, ով նկատեց.— Նախ արձանագրենք, որ հանցագործության այդ տեսակը նորություն էր Հայաստանի համար, ի տարբերություն այլ երկրների: Ինչ վերաբերում է անձի անմեղսունակությանը, ապա եթե հաստատվի, որ տվյալ անձը հանցագործություն կատարելու ընթացքում գտնվել է անմեղսունակ վիճակում, ապա վերջինս ազատվում է պատժի կրումից եւ տեղափոխվում հոգեբուժարան հարկադիր բուժման: Ես ցանկանում եմ անդրադառնալ մեկ այլ կարեւոր հանգամանքի եւս: Շատ հաճախ առերեւույթ կատարված հանցագործություններին շատ պրիմիտիվ իրավական գնահատական է տրվում: Մինչդեռ բոլոր վարկածները քննելուց հետո՝ միայն վարույթն իրականացնող մարմինը պարտավոր է դիտարկել եւ նոր միայն հրապարակել վերջնական պաշտոնական հայտարարություն: Եթե անգամ պարզվի, որ տվյալ դեպքում անմեղսունակ անձն է նման հանցանք կատարել, իսկ ո՞վ է բացառում, որ անձի հետեւում կանգնած չեն եղել այլ պատվիրատուներ, որոնք հատուկ են այդ անմեղսունակին դրդել նման սարսափազդու հանցանքի: Ակնհայտ է, որ վարույթն իրականացնող մարմինները պետք է կատարեն օպերատիվ հետախուզական լուրջ աշխատանքներ, որպեսզի հասկանան նման հանցանքի իրական պատճառը: Իսկ միգուցե սա կրոնական ծիսակատարությո՞ւն էր, գուցե վրեժի՞ արդյունք է. տարբերակները կարող են շատ լինել: Ուստի, վարույթն իրականացնող մարմնի սուրբ պարտականությունն է, որ իրենք կարողանան ջրի երես հանել նման հանցանքի իրական դրդապատճառները:
Ամփոփելով խոսքս՝ ասեմ, որ վաղաժամ եմ համարում հայտարարել, որ հանցագործությունը բացահայտված է, եւ բոլոր հանցագործները հայտնաբերված: Միեւնույն ժամանակ չեմ ասում, որ այս ամենի տակ կան թաքնված այլ ուժեր, բայց վարույթն իրականացնող մարմինը պարտավոր է դիտարկել բոլոր հնարավոր վարկածները»:
Մանրամասները՝ թերթի այսօրվա համարում։
