Գազամատակարարումն այս պահին վերականգնվել է, բայց ցանկացած պահի կարող է նաև անջատվել, փական ունի դրած
«Գազամատակարարումն այս պահին վերականգնվել է, բայց ցանկացած պահի կարող է նաև անջատվել, որովհետև Ադրբեջանը վերահսկում է գազախողովակի մի զգալի հատվածը և ունի փական դրած՝ դեռևս մարտ ամսից, որը կարող են ցանկացած պահի միացնել, անջատել»,- լրագրողների հետ զրույցում ասաց Երևանում ՄԱԿ-ի հայաստանյան գրասենյակի մոտ նստացույց անող Արցախի Հանրապետության նախկին պետնախարար, Արցախի նախկին ՄԻՊ, Արցախի պետնախարարի խորհրդական Արտակ Բեգլարյանը։
Նա նշեց, որ ճանապարհը մնում է ամբողջապես փակ, որոշակի դրական միտում կա զուտ բանակցությունների ընթացքից. «Հույս կա, որ կարող է բացվել, բայց չենք կարող ասել, թե ինչ կարող է լինել, ադրբեջանական կողմին վստահելու որևէ հիմք չունենք»։
Ա.Բեգլարյանն ընդգծեց, որ գազամատակարարումը վերականգնվել է առանց որևէ զիջման, համոզված է՝ ուղղակի միջազգային ճնշման արդյունքում, որովհետև և Արցախի արգելափակումը, շրջափակումը, և գազամատակարարման դադարեցումը բավականին մեծ միջազգային ռեզոնանս է առաջացրել։
«Բնականաբար ռուսական կողմն է աշխատում այդ ուղղությամբ, տարբեր միջազգային կառույցներ, այդ թվում՝ ՄԱԿ-ը, տարբեր երկրներ են հանդես եկել հայտարարություններով, տեղյակ եմ նաև, երևում է, որ ներքին ճնշում էլ կա»,- ասաց Արտակ Բեգլարյանը՝ միաժամանակ հիշեցնելով նաև ՄԻԵԴ որոշումը, որ Ադրբեջանին մինչև դեկտեմբերի 19-ը ժամանակ է տվել։
Նա նշեց, որ այս պահին թեև հիմնական ռեսուրսը ներդրվել է կարճաժամկետ խնդիրները լուծելու ուղղությամբ, բայց պետք է պայքարը չդադարեցնենք երկարաժամկետ երաշխիքներ ստանալ՝ Արցախի ժողովրդի անվտանգության և նմանատիպ դեպքերի կանխման համար, և հստակ լինի, որ Ադրբեջանն այսուհետ բարձր գին է վճարելու նմանատիպ ահաբեկչական ցեղասպանական ակտեր կատարելու համար։
«Այդ բարձր գինը պետք է լինի պատժի տեսքով»,- ասաց Բեգլարյանը։
