Գեղարքունիքի մարզում հայրը կասկածվում է իր անչափահաս դստերը հաճախակի ծեծի ենթարկելու մեջ և փորձել է սեռական հարաբերություն ունենալ նրա հետ          Պարզվել է վանաձորցի 20-ամյա հղի կնոջ մահվան պատճառը       Օդի ջերմաստիճանը աստիճանաբար կբարձրանա 8-10 աստիճանով. եղանակն առաջիկա օրերին    

16 հուն 2023 22:04

Տեսանյութ.Գեներալը ՊՆ-ի հողը գնել է 25 միլիոն դրամով, վաճառել՝ 420 միլիոնով․ գնորդն Իշխան Զաքարյանի որդու ընկերն է

Երևանի Նոր Նորք վարչական շրջանում ծրագրվում է 20 հարկանի բազմաբնակարան շենք կառուցել։ Դրա համար նախատեսված հողամասը տարիներ առաջ հատկացվել էր Պաշտպանության նախարարությանը։ 

«Հետք»-ը պարզել է, որ հողամասը ՊՆ-ից 25 միլիոն դրամով (62.5 հազար դոլար) ձեռք է բերել Գլխավոր շտաբի սպառազինության վարչության նախկին պետ, այժմ ԳՇ պետի օգնական Պողոս Պողոսյանը։ Պատերազմից անմիջապես հետո նա հողամասը նվիրել է իր զոքանչին։ Իսկ այս տարվա սեպտեմբերին, երբ Ադրբեջանը հարձակվեց Հայաստանի վրա, նույն հողամասը 420 միլիոն դրամով (1միլիոն 40 հազար դոլար) վաճառել են ԱԺ պատգամավոր Իշխան Զաքարյանի որդու ընկերոջը։

5420 քմ հողամասի սեփականաշնորհման պատմությունը մենք սկսեցինք ուսումնասիրել 2020 թ-ին, մինչ պատերազմը։ Մեր հարցումներից հետո Հակակոռուպցիոն կոմիտեում քրեական գործ հարուցվեց։ Պարզվում է, որ հողամասի վերջին օտարումը տեղի է ունեցել քրեական գործի նախաքննության ժամանակ՝ Հակակոռուպցիոն կամիտեի լուռ համաձայնությամբ։

Նոր Նորքի 4-րդ և 5-րդ զանգվածները կապող կամրջի հարևանությամբ Պաշտպանության նախարարությունը 1.6 հեկտար (16247 քմ) մակերեսով հողամաս ուներ։ Դա ՊՆ-ին փոխանցվել էր Վազգեն Սարգսյանի պաշտոնավարման ժամանակ։ Այդ ժամանակ ծրագրվել էր, որ հողամասի վրա պետք է կառուցվեր սպորտային համալիր, որը կօգտագործվեր ռազմական ակադեմիայի համար։ Այդ գաղափարից տարիներ անց՝ 

2013 թ.-ին 1.6 հեկտարից 0.54-ը առանձնացվել է և օտարվել։

Կադաստրի կոմիտեից ստացված տվյալների համաձայն, 5420 քմ հողամասը Պաշտպանության նախարարությունը 2013 թ.-ին վաճառել է Պողոս Պողոսյանին։ Ըստ ՊՆ-ի` հողամասի վաճառքի գինը կազմել է 25 միլիոն 215 հազար 556 դրամ։ Նախարարությունը հրաժարվել է  տրամադրել հողամասի օտարման հիմքերը՝ պատաճառաբանելով, թե վաճառքի բոլոր փաստաթղթերը, բացառությամբ պայմանագրի, ոչնչացվել են։ Նախարարության հիմնավորումն այն է, որ փաստաթղթերի պահպանության ժամկետն անցել է, ուստիեւ ոչնչացվել են։ 

Հողամասը գնելիս Պողոս Պողոսյանը զբաղեցնում էր ՀՀ ՊՆ 2-րդ բանակային կորպուսի հրամանատարի պաշտոնը։ Հողամասը ձեռք բերելուց 3 տարի անց՝ 2016 թ.-ին Պողոսյանը նշանակվում է Գլխավոր շտաբի սպառազինության վարչության պետ։

2020 թ.-ի սեպտեմբերին, երբ Ադրբեջանը լայնամասշտաբ հարձակում էր ծրագրում Արցախի վրա, Պողոս Պողոսյանը որոշում է վաճառել հողամասը։ Այդ մասին իմանում ենք հողամասի վրա տեղադրված «վաճառվում է» ցուցանակից։

Ցուցանակը հողամասում փակցված է մնում մինչև պատերազմի ավարտը, որից հետո ընդմիշտ հանվում է։

Պատերազմի ավարտից հետո Հայաստանում քաղաքական ճգնաժամ է առաջանում, որը գագաթնակետին է հասնում Զինված ուժերի գլխավոր շտաբի պետի և մի քանի տասնյակ գեներալների հայտարարությամբ։ Զինվորականները վարչապետ Նիկոլ Փաշինյանի հրաժարականն են պահանջում։ Հայտարարությանը չի միանում 4 բարձրաստիճան գեներալ։ Նրանցիցի մեկը Պողոս Լյովայի Պողոսյանն է։ 2021 թ.-ին քաղաքական իրավիճակը հանդարտվում է, փոխվում է ԳՇ ղեկավարը, իսկ Պողոս Պողոսյանը 2021 թ.-ին ազատվում է վարչության պետի պաշտոնից։ 2022-ի հունվարի 11-ին Պողոս Պողոսյանը նշանակվում է Զինված ուժերի գլխավոր շտաբի պետի օգնական։

Մինչ քաղաքական իրավիճակը կսրվեր, Պողոս Պողոսյանը փորձում է «ազատվել» 5420 քմ հողամասից։ Զինված ուժերի սպառազինության վարչության պետը 2020 թ.-ի արյունալի պատերազմի ավարտից անմիջապես հետո ձեռնամուխ է լինում հողամասի ապահով փոխանցումը կազմակերպելու գործին։ Նոյեմբերի 20-ին նա հողամասը նվիրաբերում է իր զոքանչին՝ Լուսիկ Ռաֆիկի Հովսեփյանին։

2022 թ.-ին Հայաստանում քաղաքական իրավիճակը խաղաղվում է, ռազմական իրադրությունը` սրվում։ Ադրբեջանական ուժերը սեպտեմբերին հարձակվում են արդեն Հայաստանի վրա։ Նույն ժամանակահատվածում Պողոս Պողոսյանը փորձում է ավարտին հասցնել ՊՆ-ից ընդամենը 25 միլիոն դրամով ձեռք բերած հողամասի վերջնական օտարումը։ Գեներալին հաջողվում է հողամասը վաճառել 420 միլիոն դրամով։
Երբ տեղեկացանք հողամասի վերջնական օտարման մասին, կրկին դիմեցինք պաշտպանության նախարարություն։ Խնդրեցինք մեզ տրամադրել ՊՆ-ի հողը Պողոս Պողոսյանին վաճառելու պայմանագրի պատճենը։ Նախարարության գլխավոր քարտուղար Համլետ Բատիկյանը գրավոր հայտնեց, որ մեզ հետաքրքրող հողամասի օտարման վերաբերյալ Հակակոռուպցիոն կոմիտեում քրեական գործ է հարուցվել և նախաքննություն է ընթանում։Այդ հիմքով մերժվեց պայմանագրի տրամադրումը։

Այս պատասխանից հարց է ծագում՝ ինչպե՞ս է հնարավոր եղել Հակակոռուպցիոն կոմիտեում (նախկին ՀՔԾ) քննվող քրեական գործի նախաքննության ժամանակ հողամասն օտարել։ Այն դեպքում, երբ հենց հողամասի օտարման (2013 թ.-ի գործարքի) առնչությամբ էր քրեական գործը հարուցվել։

Գրավոր հարցում ուղարկեցինք Հակակոռուպցիոն կոմիտե։ Կոմիտեի լրատվական ծառայությունից չպատասխանեցին գլխավոր հարցերին՝ ինչպե՞ս է հնարավոր եղել նախաքննության փուլում գույքի օտարումը, արդյո՞ք գույքի վրա արգելանք էր դրվել։ Միայն հայտնել են, որ 2022 թ.-ի ապրիլի 11-ին Քրեական օրենսգրքի 309-րդ հոդվածի 3-րդ մասով քրեական վարույթ է նախաձեռնվել (պաշտոնատար անձի կողմից պաշտոնեական լիազորություններն անցնելու առերևույթ հանցագործության դեպքի առթիվ)։ Քրեական վարույթում մեղադրյալ չկա։

Սա Սասուն Խաչատրյանի ղեկավարած Հակակոռուպցիոն կամիտեում քննվող առաջին գործը չէ, երբ նախաքննության ժամանակ քննիչները թույլ են տալիս կամ չեն խոչընդոտում, որ նախկին կամ գործող պաշտոնյաները կարողանան օտարել կասկածելի ծագում ունեցող իրենց գույքերը։ Այդպես է եղել նաև նախկին վարչապետ Հովիկ Աբրահամյանի առանձնատան վաճառքի դեպքում, պաշտպանության նախկին նախարար Վիգեն Սարգսյանի բնակարանի վաճառքի դեպքում։

Ո՞ւմ է վաճառվել հողը, և ի՞նչ են ծրագրում կառուցել

Պողոս Պողոսյանի զոքանչից 5420 քմ մակերեսով հողամասը այս տարվա սեպտեմբերի 20-ին գնել է Գարուշ Պապիկյանը։ Հանրության ուշադրության կենտրոնում Գարուշ Պապիկյանը հայտնվեց 2019-ի մարտին, երբ նրա ընկերությունը սկսեց Ազգային ժողովի մաքրությունն իրականացնել։

Գարուշ Պապիկյանը Ազգային ժողովի պատգամավոր Իշխան Զաքարյանի որդու՝ Վարդան Զաքարյանի ընկերն է։ Իշխան Զաքարյանի փեսայի՝ Խաչատուր Սաֆարյանի հետ էլ բիզնես-գործընկեր է («Քլիներս» ՍՊԸ-ի բաժնետերերն են)։

Գարուշ Պապիկյանը հողամասի համար բանակցել է Պողոս Պողոսյանի հետ, բայց փաստաթղթերով գնել է Լուսիկ Հովսեփյանից։ Հողամասը վաճառվել է 420 միլիոն դրամով, որից 404 միլիոն դրամը Գարուշ Պապիկյանը «Ամերիբանկից» վարկ է վերցրել, իսկ 16 միլիոնը վճարել է իր միջոցներից։
Գարուշ Պապիկյանը «Հետք»-ի հետ զրույցում հաստատեց իր և Իշխան Զաքարյանի որդու ընկերության փաստը, փեսայի հետ գործընկերության հանգամանքը։ Պապիկյանը հայտնեց նաև, որ հողամասը գնելուց հետո հնարավոր ռիսկերի առաջացման դեպքում իր գումարը պետք է վերադարձնեն։ Այդպես են պայմանավորվել ինքն ու գեներալ Պողոս Պողոսյանը։ Հողի նոր սեփականատերը վստեցնում է, որ այս գործարքը և ընդհանրապես իր բիզնես գործունեությունն ԱԺ պատգամավոր Իշխան Զաքարյանի հետ կապ չունեն։ Ըստ նրա՝ Հայաստանում հնարավոր է կառուցապատման բիզնես անել առանց քաղաքական ազդեցիկ կապերի։

Իշխան Զաքարյանի քաղաքական կուրսի շրջադարձային փոփոխության և այս գործարքի միջեւ Գարուշ Պապիկյանը կապ չի տեսնում։ Հիշեցնենք, որ Վերահսիչ պալատի նախկին նախագահ, ապա ընդդիմադիր «Պատիվ ունեմ» խմբակցության ցուցակով պատգամավոր դարձած Զաքարյանը իրավապահների ուշադրության կենտրոնում հայտնվելուց հետո դուրս եկավ խմբակցությունից եւ իրեն հռչակեց անկախ պատգամավոր։ Այդ կարգավիճակում Զաքարյանը միակն էր ընդդիմադիրներից, որ մասնակցեց Հայաստանի նախագահի պաշտոնում Վահագն Խաչատուրյանի ընտրությանը (Խաչատուրյանին այդ պաշտոնում առաջադրել էր ՔՊ-ն)։

Իշխան Զաքարյանը մեր գրավոր հարցմանն ի պատասխան հայտնել է, որ չի ճանաչում Գարուշ Պապիկյան անուն, ազգանունով մարդու։ Սա այն դեպքում, երբ Գարուշ Պապիկյանը մեզ ասել է, որ Իշխան Զաքարյանին վերջին անգամ հանդիպել է մեկ տարի առաջ՝ դահուկ քշելիս։

Երևանի Թևոսյան փողոց 4/1 հասցեի 5420 քմ հողամասում Գարուշ Պապիկյանը ցանականում է 20-հարկանի բնակելի շենք կառուցել։ Նա արդեն դիմել է Երևանի քաղաքապետարան, որպեսզի նախագծման թույլտվություն ստանա։ Դիմումին կից քաղաքապետարանին է ներկայացրել էսքիզային նախագիծը, որտեղ պատկերված է շենքի խիստ նախնական տեսքը։ 

Հ․Գ․ Եթե Հակակոռուպցիոն կոամիտեում իսկապես օբյեկտիվ և բազմակողմանի քննություն տարվեր, որի նկատմամբ դատախազությունը պատշաճ հսկողություն իրականացներ, մեր այս նյութը հավանաբար չէր գրվի։ Բայց քանի որ այդպես չէ, հարց է ծագում, թե ինչպե՞ս է ՀԿԿ քննիչը շարունակելու այս գործի քննությունը, երբ թույլ է տվել հողամասն անխոչընդոտ օտարեն ու կառուցապատման ծրագիր սկսեն։

Հեղինակ՝ Տիրայր Մուրադյան
Տեսանյութի նկարահանումը և մոնտաժը Սարո Բաղդասարյանի

Մեկնաբանություններ


Համընկնող լուրեր