Թուրքիայում ահաբեկչություն է կանխվել, բայց թե որտեղ էր պլանավորվել պայթյունը, չի նշվում
Շաբաթ օրը՝ փետրվարի 25-ին, Թուրքիայի ներքին գործերի նախարարությունը հայտարարել է ոմն Գուլդա Բեբեկի ձերբակալության մասին, ով առնչություն ունի Քրդստանի աշխատավորական կուսակցության հետ և կասկածվում է ահաբեկչություն կազմակերպելու մեջ։Ոստիկանության և հետախուզության աշխատակիցները գործողություն են իրականացրել Քոնիայում և Դիարբեքիրում։ Քոնիայի տներից մեկում հայտնաբերվել է Բեբեկը, նրանից առգրավվել է ատրճանակ՝ զինամթերքով և «ահաբեկչություն նախապատրաստելու համար տեխնիկա»։
Ուժայինները պնդում են, որ ամբաստանյալը նախկինում գործել է Իրանում, իսկ անցյալ տարի տեղափոխվել է Թուրքիա։ Միաժամանակ նա ապօրինի հատել է երկրի սահմանը։
Ըստ քննիչների՝ Գուլդա Բեբեկը պետք է կատարեր ահաբեկչություն՝ նման 2022 թվականի նոյեմբերին Ստամբուլում տեղի ունեցածին։
Հիշեցնենք, որ այն ժամանակ Ստամբուլի կենտրոնական թաղամասի Բեյօղլուի հետիոտնային Իսթիքլալ փողոցում պայթուցիկ սարքը գործի է դրվել մի կնոջ կողմից։ Վեց մարդ մահացել էր, ավելի քան 80-ը՝ վիրավորվել։
Նշվում է, որ կատարվել են բոլոր անհրաժեշտ նախապատրաստական աշխատանքները, բայց թե որտեղ էր պլանավորվել պայթյունը, չի նշվում։
