Սումգայիթում վտանգավոր ռադիոակտիվ նյութ է հայտնաբերվել
Ադրբեջանի մեծությամբ երկրորդ քաղաքում՝ Սումգայիթում, հայտնաբերվել է ցեզիում-137 վտանգավոր ռադիոակտիվ նյութ, հայտնում է այդ երկրի ԱԻՆ Միջուկային և ռադիոակտիվ գործունեության կարգավորման պետական գործակալությունը։«Նորարարությունների և թվային զարգացման գործակալության միջուկային հետազոտությունների բաժնի կողմից իրականացված ռադիոլոգիական փորձարկումների ընթացքում Սումգայիթ քաղաքում հայտնաբերվել է անոմալ ճառագայթման մակարդակով տարածք։
Երբ կրկնակի ստուգումներով հաստատվել է մասնագետների եզրակացությունները, դրանից հետո տեղեկացվել են համապատասխան պետական մարմինները։ Արդյունքում վտանգավոր ռադիոակտիվ նյութ է հայտնաբերվել՝ ցեզիում- 137»,- ասված է հաղորդագրությունում։
Ցեզիում-137-ը ռադիոակտիվ նուկլիդ է՝ 55 ատոմային համարով։ Այն առաջանում է հիմնականում միջուկային ռեակտորներում միջուկային տրոհման ժամանակ։
