Հայաստանը Հնդկաստանից հակադրոնային համակարգեր է գնում. Eurasian times
Հնդկաստանից հրթիռահրետանային կայաններ և հրթիռներ ներկրելուց հետո Հայաստանն այժմ հակադրոնային համակարգ է ներմուծում իր հարավասիական ընկերոջից։ Այս մասին գրում է Eurasian times-ը։«Դա տեղի է ունեցել այն ժամանակ, երբ հակամարտությունից ավերված երկիրը ցանկանում է սովորել Հնդկաստանից, թե ինչպես արդիականացնել խորհրդային ժամանակների պաշտպանական սարքավորումները: Նույնիսկ երբ փխրուն խաղաղություն է տիրում կովկասյան երկրների միջև, Նյու Դելին մտածում է Հայաստանին ռազմական տեխնիկայի նոր խմբաքանակի մատակարարման մասին»,-գրել է պարբերականը։
Անանուն աղբյուրը հայտնել է, որ Հայաստանը պայմանագիր է կնքել Հնդկաստանի կողմից մշակված Zen հակադրոնային համակարգ (ZADS) գնելու համար:
Հնդկաստանի ռազմաօդային ուժերը (IAF) գնել են այս հակադրոնային համակարգը 2021 թվականին, իսկ Հնդկաստանի բանակը պատվիրել է 20 միավոր C-UAS՝ 2,27 միլիարդ INR (27,3 միլիոն ԱՄՆ դոլար) արժողությամբ: C-UAS-ի մատակարարումը հնդկական բանակին կսկսվի 2024 թվականի մարտին:
Zen հակադրոնային համակարգն աշխատում է անօդաչու թռչող սարքերի հայտնաբերման, դասակարգման և պասիվ հսկողության, տեսախցիկի սենսորների և սպառնալիքների չեզոքացման ուղղությամբ։
