Արեգակի վրա 2 ուժեղ բռնկում է գրանցվել, որոնք այսօր և վաղը կարող են Երկրի վրա մագնիսական փոթորիկ առաջացնել
Կիրառական երկրաֆիզիկայի ինստիտուտի մասնագետները Արեգակի վրա M դասի (ուժեղ) երկու բռնկում են արձանագրել, որոնք, ինչպես գիտնականները ենթադրում են, կարող են Երկրի վրա մագնիսական փոթորկի պատճառ դառնալ նոյեմբերի 30-ից դեկտեմբերի 1-ը:«Ռենտգենյան տիրույթում արձանագրվել է M3.4 բռնկում՝ 28 րոպե տևողությամբ և M9.8 բռնկում՝ 34 րոպե տևողությամբ։ Դրանք ուղեկցվել են II սպեկտրային տիպի ռադիոհաղորդումների պոռթկումով և կորոնային զանգվածի արտանետմամբ, որը պարունակում է գեոարդյունավետ բաղադրիչ: Գեոմագնիսական դաշտի խախտումն սպասվում է նոյեմբերի 30-ից դեկտեմբերի 1-ը»,-ասվում է ինստիտուտի տարածած հաղորդագրությունում։
Կիրառական երկրաֆիզիկայի ինստիտուտի կանխատեսմամբ՝ հաջորդ 27 օրվա ընթացքում հնարավոր է արևի բռնկման ցածր և չափավոր ակտիվություն, սակայն հնարավոր են նաև X դասի (ամենաուժեղ) բռնկումները:
Հիշեցնենք, որ նոյեմբերի երկրորդ կեսին Արեգակի վրա հզոր պոռթկում էր տեղի ունեցել ինչի հետևանքով նոյեմբերի 16-ին Երկրին բախվել էր մագնիսական հզոր փոթորիկ։
Հուլիսին NASA-ն հաղորդել էր արեգակնային բծերի ռեկորդային քանակի մասին։ Միայն հունիսի ընթացքում հետազոտողներն Արեգակի վրա հայտնաբերել էին 160 արեգակնային բիծ, ինչը ամենաբարձր ցուցանիշն է վերջին քսան տարվա ընթացքում:
Արեգակնային ընթացիկ ցիկլը, որը 25-րդն է գրանցումների սկզբից ի վեր, ինտենսիվություն է ձեռք բերում շատ ավելի արագ տեմպերով, քան կանխատեսել էին NASA-ն և ԱՄՆ Օվկիանոսների և մթնոլորտի ազգային վարչությունը: Այս իրավիճակը մտահոգություն է առաջացնում արևային փոթորիկների թվի աճի վերաբերյալ:
Մարտին NASA-ի Solar Dynamics աստղադիտարանը X1.2 ինդեքսով X դասի բռնկում էր գրանցել: X դասի բռնկումները տեղի են ունենում ավելի հազվադեպ, քան մյուս դասերի բռնկումները և ունեն 10−4 Վտ/մ2-ից ավելի ինտենսիվություն: 2023-ի փետրվարի 17-ին աստղադիտարանը հայտնաբերել է X2.28-ի հզոր բռնկում։ Երկու իրադարձություններն էլ հանգեցրին ռադիոյի անջատմանը:
