ԼՂ հայերը պետք է ապահով վերադառնալու հնարավորություն ունենան
Ղարաբաղի հայերը պետք է կարողանան տարածաշրջան վերադառնալ իրենց իրավունքներով և, իհարկե, պատշաճ կերպով ապահովված անվտանգությամբ։ Այս մասին այսօրվա ճեպազրույցում հայտարարել է ՌԴ ԱԳՆ պաշտոնական ներկայացուցիչ Մարիա Զախարովան։«Մեկ անգամ չէ, որ ընդգծվել է, որ Ռուսաստանը ողջունում է, որ ղարաբաղցիները վերադառնան տարածաշրջանը՝ իրենց իրավունքների և անվտանգության պատշաճ ապահովմամբ», - ասել է Զախարովան։
Մոսկվան, իր հերթին, պատրաստ է ամեն կերպ աջակցել այդ գործընթացին, նշել է ռուս դիվանագետը։
Նրա խոսքով, այս հարցը պետք է տարանջատել Հայաստանից հեռացած ադրբեջանցիների և Ադրբեջանից հեռացած հայերի վերադարձի թեմայից, մասնավորապես Սումգայիթից և այլ քաղաքներից 80-ականների վերջին-90-ականների սկզբին։
«Այս կատեգորիայի քաղաքացիների պոտենցիալ վերադարձի համար պայմաններ ստեղծելու համար անհրաժեշտ է մեծ ծավալի աշխատանք կատարել, որպեսզի հայ-ադրբեջանական հարաբերությունների համապարփակ կարգավորում իրականացվի, ստեղծվի վստահության մթնոլորտ։ Այդ նպատակով անհրաժեշտ է իրականացնել Ռուսաստանի և Ադրբեջանի և Հայաստանի ղեկավարների եռակողմ հայտարարություններում նախատեսված միջոցառումները, մշակել և կնքել խաղաղության պայմանագիր, ապաշրջափակել տրանսպորտային հաղորդակցությունը տարածաշրջանում, սահմանագծել և սահմանազատել սահմանները»,- ասել է Զախարովան։
