Այսօր Ավագ Երեքշաբթի է, երկնքի արքայությունը պիտի նմանեցվի տասը կույսերի
Այսօր Ավագ Երեքշաբթին է, հիշատակությունը տասը կույսերի։1 Այն ժամանակ երկնքի արքայութիւնը պիտի նմանեցուի տասը կոյսերի, որոնք, իրենց լապտերներն առած, փեսային եւ հարսին դիմաւորելու ելան:
2 Նրանցից հինգը յիմար էին, իսկ հինգը՝ իմաստուն:
3 Յիմարները լապտերներն առան, բայց իրենց հետ ձէթի պաշար չվերցրին:
4 Իսկ իմաստունները իրենց լապտերների հետ միասին ամաններով ձէթ վերցրին:
5 Եւ երբ փեսան ուշացաւ, ամէնքն էլ նիրհեցին եւ քուն մտան:
6 Եւ կէսգիշերին ձայն լսուեց. "Ահա փեսան գալիս է, նրան դիմաւորելո՛ւ ելէք”:
7 Այն ժամանակ բոլոր կոյսերը վեր կացան եւ իրենց լապտերները կարգի բերեցին:
8 Յիմարները իմաստուններին ասացին. "Ձեր այդ իւղից տուէ՛ք մեզ, որովհետեւ ահա մեր լապտերները հանգում են”:
9 Իմաստունները պատասխան տուեցին եւ ասացին. "Գուցէ թէ՛ մեզ եւ թէ՛ ձեզ չբաւականացնի, ուստի գնացէ՛ք վաճառողների մօտ եւ ձեզ համար գնեցէ՛ք”:
10 Երբ նրանք գնացին, որ գնեն, փեսան եկաւ, եւ ովքեր պատրաստ էին, նրա հետ հարսանիքի սրահը մտան, ու դուռը փակուեց:
11 Յետոյ եկան միւս կոյսերն էլ ու ասացին. "Տէ՛ր, տէ՛ր, բա՛ց արա”:
12 Նա պատասխան տուեց ու ասաց. "Ճշմարիտ եմ ասում ձեզ, որ ձեզ չեմ ճանաչում”:
13 Արթո՛ւն կացէք, որովհետեւ չգիտէք ո՛չ օրը եւ ո՛չ էլ ժամը:
Աւետարան ըստ Մատթէոսի
