Փաշինյանի կողմից առերևույթ հանցագործություն կատարելու մասին երկու հաղորդումներին ընթացք է տրվել. Դատախազություն
ՀՀ գլխավոր դատախազությունը ստացել եւ ընթացք է տվել Նիկոլ Փաշինյանի կողմից առերեւույթ սահմանադրական կարգը տապալելու ու թշնամանք հրահրելու մասին հաղորդումները։Ինչպես արդեն հայտնել ենք՝ «Զարթոնք» ազգային քրիստոնեական կուսակցությունը հուլիսի 22-ին երկու հաղորդում է ներկայացրել Նիկոլ Փաշինյանի դեմ։
Առաջին հաղորդմամբ գլխավոր դատախազի ուշադրությունն է հրավիրվել այն հանգամանքների վրա, ըստ որոնց Փաշինյանն իր ֆեյսբուքյան անձնական օգտահաշվում բացահայտ կերպով հրահանգավորումներ է իրականացրել ինչպես իրավապահ համակարգի մարմիններին, այնպես էլ դատական իշխանությանը՝ իրականացնելու ձերբակալումներ, հարուցելու հանրային քրեական հետապնդումներ, ինչպես նաև կալանավորելու բարձրաստիճան հոգևորականներին` Բագրատ արքեպիսկոպոս Գալստանյանին, Միքայել արքեպիսկոպոս Աջապահյանին, ինչպես նաև գործարար Սամվել Կարապետյանին:
Փաշինյանն իր գործողություններով խախտել է օրենսդիր, գործադիր և դատական իշխանությունների բաժանման ու հավասարակշռման սահմանադրական սկզբունքը, օրինականության սկզբունքը, միջամտել արդարադատության իրականացմանը, հրապարակայնորեն խախտել անձանց անմեղության կանխավարկածը, ինչին ձայնակցել են նաեւ այլ քպականներ։
Կուսակցության կարծիքով` իշխանության ներկայացուցիչների կողմից, Նիկոլ Փաշինյանի գլխավորությամբ, սահմանադրական կարգը տապալվել է, այդ թվում՝ օրենսդիր, գործադիր և դատական իշխանությունների բաժանումն և հավասարակշռումը երաշխավորող Սահմանադրության նորմի գործողությունը փաստացի դադարեցված է։
Երկրորդ հաղորդմամբ դատախազին հիշեցրել են, որ ՀՀ Սահմանադրության 18-րդ հոդվածի համաձայն՝ Հայաստանի Հանրապետությունը ճանաչում է Հայաստանյայց առաքելական սուրբ եկեղեցու՝ որպես ազգային եկեղեցու բացառիկ առաքելությունը հայ ժողովրդի հոգևոր կյանքում, նրա ազգային մշակույթի զարգացման և ազգային ինքնության պահպանման գործում:
««Խղճի ազատության և կրոնական կազմակերպությունների մասին» օրենքի 17-րդ հոդվածի առաջին մասի «բ» կետի համաձայն՝ ՀՀ եկեղեցին անջատված է պետությունից: Սույն հիմնադրույթի համաձայն պետությունը` … չի միջամտում եկեղեցու և կրոնական կազմակերպությունների` օրենքին համապատասխանող գործունեությանը և ներքին կյանքին: Մինչդեռ՝ Նիկոլ Փաշինյանը տևական ժամանակ ճնշում է գործադրում Հայաստանյայց առաքելական սուրբ եկեղեցու նկատմամբ` միջամտելով եկեղեցու ինքնակառավարմանը՝ ներքին գործերին: Ամենայն հայոց կաթողիկոսին փոխելու գործընթացն ուղիղ միջամտություն է եկեղեցու ինքնակառավարմանը։
Ինչպես «Փաստինֆո»-ին հայտնեցին դատախազությունից, երկու հաղորդումներն էլ ստացվել են ընթացք տրվել՝ օրենքով սահմանված կարգով։
Դատախազությունը չի մանրամասնել, թե որ նախաքննական մարմնին է ուղարկել վարույթ նախաձեռնելու համար։
