Հայաստանը մերժել է ՀԱՊԿ օգնությունը. . ինչու է սրվում իրավիճակը Նախիջևանում
Հայաստանի ԱԳՆ խոսնակ Տիգրան Բալայանը, պատասխանելով Նախիջեւանի ուղղությամբ ՀԱՊԿ ուժերի տեղակայման հնարավորության մասին հարցին, ասել է, որ չի կարծում, թե Հայաստանի զինված ուժերն արտաքին աջակցության կարիք ունեն իրավիճակի վերահսկողության համար:Հայաստանն առաջին անգամ չի հայտարարում, որ ՀԱՊԿ օգնության կարիքը չունի: Հայաստանն օգնության չէր դիմել ապրիլյան պատերազմի ժամանակ՝ չնայած ՀԱՊԿ-ում հավանաբար անհամբերությամբ էին սպասում Հայաստանի դիմելուն:
2016 թվականի ապրիլի 27-ին Երեւանում մամուլի ասուլիսի ժամանակ ՀԱՊԿ այն ժամանակվա գլխավոր քարտուղար Նիկոլայ Բորդյուժան հայտարարեց,, որ Հայաստանն օգնության համար չի դիմել ՀԱՊԿ-ին ղարաբաղյան հակամարտության սրման ժամանակ:
Ընդ որում, Բորդյուժան դրական է պատասխան լրագրողի հարցին՝ արդյոք դա նշանակում է, որ Լեռնային Ղարաբաղը միջազգային իրավունքի առումով Հայաստանի մաս չէ, որ ՀԱՊԿ ուժերը կարող են Հայաստանին պաշտպանել միայն միջազգային ճանաչված սահմանների վրա հարձակման դեպքում: «Այո, դուք ճիշտ եք հասկանում», ասել է նա:
Միեւնույն ժամանակ նա նշել էր, որ Լեռնային Ղարաբաղում իրավիճակը մեծ նշանակություն ունի ՀԱՊԿ պատասխանատվության գոտում անվտանգության ապահովման համար, եւ եթե սրվի, «կպայթեցնի» ամբողջ Կովկասը:
Ավելի վաղ՝ 2015 թվականի հունիսի 18-ին, Բորդյուժան հիշեցրել է, որ չնայած հակամարտությունը հղի է բացասական զարգացումներով, «ՀԱՊԿ-ը չի կարող միջամտել, չունի համապատասխան մանդատ»: Ընդ որում, գլխավոր քարտուղարն ընդգծել էր, որ Հայաստանը ՀԱՊԿ լիիրավ անդամ է եւ իրավունք ունի իր տարածքում իրավիճակի բացասական զարգացման դեպքում օգնություն ստանալ ՀԱՊԿ գործընկերներից:
Փաստացի, ՀԱՊԿ-ը դեմ չէ միջամտել, բայց Ղարաբաղի համար ՀԱՊԿ-ը մանդատ չունի, եւ մնում է միայն չխանգարել, որ հակամարտությունը սահուն տեղափոխվի Հայաստանի տարածք:
ՀԱՊԿ-ին դիմելուց Հայաստանի հրաժարվելը չի կարող չանհանգստացնել նաեւ Ադրբեջանին: Չնայած Բաքուն միշտ դեմ է հանդես եկել տարածաշրջանում ռուսական ուժերի հայտնվելուն, սակայն Ադրբեջանը հայկական բանակի սուվերենության մակարդակի նվազումն ու ՀԱՊԿ «հովանոցը» կարող է դիտարկել որպես Հայաստանի «կանխատեսելիության» երաշխիք:
Հնարավոր է, դրանով են պայմանավորված Ադրբեջանի ակտիվ գործողությունները Նախիջեւանում: Ադրբեջանական զորքերը վերջին շրջանում փորձում են կրճատել չեզոք գոտին: Ավելին, Ադրբեջանը հայտարարում է իր իսկ տարածքների «գրավման» մասին եւ սպառնում խաղաղ բնակիչներին: Հայկական կողմն ի պատասխան հայտարարում է, որ ադրբեջանցիներին թույլ չի տա ամրապնդվել հայ բնակչության համար վտանգավոր դիրքերում:
Այս օրերին Ադրբեջանը քաղաքական-դիվանագիտական հարձակում է ծավալել՝ փորձելով հասնել նրան, որ Հայաստանը «հավատարմության» նոր երդումներ տա Ռուսաստանին: Բաքու են հրավիրվել վճարված պատգմավորներ ու քաղաքական գործիչներ, որոնք ասում են, որ իբր Հայաստանն Ամերիկայի նախագիծ է դառնում, եւ Ռուսաստանը պետք է գործի: Ըստ երեւույթին, ՀԱՊԿ-ի միջոցով:
Հենց Հայաստանից դիմում ստացվի, «դաշնակիցներն» անմիջապես օգնության կշտապեն, որոնք զենք են վաճառում Ադրբեջանին:
lragir.am
.png)
