Ինչպես են ադրբեջանական դեղերը հայտնվել մեր շուկայում

«Ավելոքս» անվամբ դեղի տուփերն արդեն հանձնվել են Դեղերի և բժշկական տեխնոլոգիաների փորձագիտական կենտրոն, պարզվում է՝ դեղն օրինական ճանապարհո՞վ է հայտնվել մեր շուկայում, թե ոչ, արդյոք Հայաստանում գրանցված տարբերակո՞վ է: Այս մասին Tert.am-ի հետ զրույցում ասաց առողջապահության նախարարի մամուլի խոսնակ Լիանա Եղիազարյանը` անդրադառնալով Հայաստանի դեղատներում հայտնված ադրբեջանական արտադրության դեղերի մասին տեղեկությանը:

Նշենք, որ «Ժողովուրդ» օրաթերթը գրել էր, որ հայկական շուկայում հայտնվել են ադրբեջանական արտադրության դեղեր, որոնք ազատորեն վաճառվում են դեղատներում: Խոսքն «Ավելոքս» անվամբ դեղի մասին է, որի լուսանկարները տարածվել էին համացանցում, դեղի տուփի վրա ադրբեջաներեն գրություն է, այդ երկրի լեզվով է նաև դեղին կից բացատրական թերթիկը:

Լիանա Եղիզարյանն ասաց, որ նշված դեղի մասին տեղեկությունը երեկ հայտնել է Առողջապահության նախարարության ենթակայության բժշկական հիմնարկներից մեկի բժշկուհին:

«Եթե հասկանանք, որ գործ ունենք անօրինական դեպքի հետ՝ գործը կփոխանցվի տեսչությանը, որ փորձաքննություն անցկացվի: Իսկ եթե անօրինական ներկրման դեպք է, ապա սպասվում է վարչական վարույթ: Իրականում դա «Բայեր» ընկերության արտադրության դեղ է, և հավանական է, որ Ադրբեջանի համար է արտադրված, բայց ադրբեջանական ծագման է, թե ոչ՝ կպարզի փորձաքննությունը: Եթե դա Ադրբեջանի համար է արտադրված, ապա գուցե անօրինական ճանապարհով է մուտք գործել է ՀՀ»,-շեշտեց նա:

Լիանա Եղիազարյանը նշեց, որ ուսումնասիրության արդյունքները գուցե հենց վաղը կտան բոլոր հարցերի պատասխանները: