Համանախագահող երկրների տեսակետների միջև հստակ տարբերություններ կան. Տեսանյութ
Օգոստոսի 12-ին «Հայացք» մամուլի ակումբում Գլոբալիզացիայի և տարածաշրջանային համագործակցության վերլուծական կենտրոնի տնօրեն Ստեփան Գրիգորյանը խոսելով արցախյան խնդրի մասին նշեց,
որ ստատուս քվոյի մասին կարգախոսերը կարևոր են, սակայն արդեն հնացած.«Երբ խոսում ենք ստատուս քվոյի մասին, ապա, որ ստատուս քվոյի մասին է խոսքը։ Հիմա, երբ կա անվստահություն Ադրբեջանի նկատմամբ։ Ադրբեջանցիները մոտեցան և վերցրեցին Թալիշ գյուղը։ Հիմա Թալիշի բնակիչները չեն կարողանում վերադառնալ։ Ո՞ր ստատուս քվոյի մասին է խոսքը։ Երկրի ներսում լուրջ խնդիրներ կան. կոռուպցիա, մենաշնորհներ։ Չպայքարել այդ խնդիրների դեմ՝ նշանակում է թուլանալ և կորցնել Ղարաբաղը»,-ասաց նա։ Ըստ
Ստեփան Գրիգորյանի Ռուսաստանն ուզում է ինչ-որ հարցեր լուծել՝ օգտվելով իրավիճակից: Նա
համոզված է, որ Ռուսաստանն իր շահերն ունի Ադրբեջանից և հանուն այդ շահերի պատրաստ է ճնշում գործադրել Հայաստանի վրա՝ ԼՂՀ հարցում զիջումներ անել հօգուտ Ադրբեջանի. «Ռուսաստանը ԼՂ հարցում շեղվում է Մինսկի խմբի ուղղությունից և արանքում ցանկանում է ինչ-որ բան կորզել Ադրբեջանից: Նման բաներն անում են ավելի քողարկված և նուրբ, իսկ այս դեպքում դա ուղղակիորեն ասվում է»,- ասաց բանախոսը:
Ստեփան
Գրիգորյանը նաև նշեց, որ Լեռնային Ղարաբաղի հետ կապված պրոցեսի ստվերային մասը բավական ակտիվ է ընթանում և մի շարք գործոններ կան, որոնք ազդում են հարցի լուծման տարբերակների վրա. «Նախ խոր անվստահություն կա Ադրբեջանի և Հայաստանի միջև՝ թե՛ երկու երկրների իշխանությունների, թե՛ հասարակությունների միջև: Երկրորդ՝ Հայաստանի հասարակության անվստահությունն է իր իշխանությունների հանդեպ: Երրորդ՝ ԵԱՀԿ Մինսկի խմբի ներսում տիրող իրավիճակն է»,- ասաց քաղաքագետն՝ ընդգծելով, որ համանախագահող երկրների տեսակետների միջև հստակ տարբերություններ կան:
Քաղաքագետը կարծում է, որ այս պարագայում Հայաստանն ամեն բան պետք է անի վերացնելու ներքին լարվածությունն ու ռեպրեսիաները. «Անհրաժեշտ են ոչ ավանդական որոշումներ, օրինակ՝ոչ ֆորմալ կոռուպցիայի դեմ պայքարելը կամ թուլացնել մենաշնորհները: Սկսել ձերբակալել այն ոստիկաններին, որոնք ուժ կիրառեցին հուլիսի 17-30-ը ընկած ժամանակահատվածում: Այդ
քայլով վստահությունը կբարձրացնի, այլ ոչ թե հանել գործից, հետո այդ
մարդիկ այլ պաշտոններում հայտնվեն: Պետք է ներսում վստահության մթնոլորտ ստեղծվի, բացի դրանից դա արդարության հետ է կապված. ոստիկանը, որը դաժանաբար ծեծում էր լրագրողին, պետք է բանտում լինի: Նա
իրավունք չունի հրաժարական տա ու դուրս գա խաղից»:
